Фото: Ани и Дими
Авангардното значи иновативно, експериментално и поинакво. Тоа е она што од двоецот Hard to Explain сака да го прави. Девојките од овој тим, Катерина Попева и Марија Дацевска, се дефинираа со сопствен, поетично авангарден стил, и во сите свои досегашни прикажувања ja вметнуваат формата на уметнички перформанс. И со ова последно претставување на колекцијата пролет-лето 2014, кое всушност го означи стартот на деветтата сезона на Модниот викенд-Скопје, направија нов обид да ја раскажат својата модна приказна со наслов „Раскажувачот” на специфичен, авангарден, но и бајковит начин, со малку неконвенционално поставена ревија.
Фото: Ани и Дими
Сè, од шарената со конци обрабена бандера пред нивното атеље, па до моделите на ревијата, поставена на калдрмата под неа, се искажува всушност како тежнеење за еден поинаков, поартистички пристап кон третманот и создавањето на облеката. Нивната главната цел со оваа колекција е низ перформанс да се раскаже една посебна приказна за Скопје, кој погледнат низ нивна визура е сместен на калдрмата во чаршијата и живее една своја посебна бајка.За ревијата беше подготвена и сценографија во духот на инспирацијата. Со воведната приказна на раскажувачот, виолина и свеќи, Hard to Explain прикажа модели, кои иако носат сценска нота во својата скулптуралност, сепак ја имаат и својата нослива страна, но и момент на изненадување.Тоа се воочува пред сè во парчињата изработени од жица плетена со чингелакија што раѓа интересен резултат во формата, а воедно се вклопува во трендовските текови на актуелизирање на металикот. Има тука и експериментирање и со други необични материјали, но не секој од тие обиди да се претворат во носливи функционира успешно до крај.
Фото: Ани и Дими
Уште еден од највпечатливите моменти во оваа колекција, со кој таа се истакнува, се и додатоците: вечатливиот накит и уникатните торби. Драпирање, асиметрија, слоевитост, транспарентност, нагласена половина се клучните точки на оваа колекција во која доминираат пастелни тонови, зелена, виолетова, сина, крем и сивата боја. А базично се користени свила, памук, кожа и природни материјали. Видливо е силно присуство на рачна работа посебно во додатоците, иако тоа се и веќе познати референци. Главно тоа се дводелни изгледи со иновативни здолништа, но иако логично надоградени со горен косетен дел сепак, кога тој по дефиниција не е совршен, ја разводнува целата слика. Место на кое треба да се биде посебно прецизен во мислата.
Севкупно, ова е една младешки свежа колекција упатена кон малку посмелите, оние на кои не им треба тешкотија на објаснувањето.
Фото: Ани и Дими
Фото: Ани и Дими
Фото: Ани и Дими
Нема коментари