Култниот албум на скопската група „Бастион“ ќе биде винилно реиздаден од страна на ACC Records и по тој повод вечерва во 21 часот ќе се одржи промоција во МКЦ, во Бифе Фросина. Промоцијата на која ќе бидат присутни членовите на бендот, ќе биде збогатена со концерт на Тодор Караколев и A Colder Consciousness ди-џеј сет. Посетителите ќе можат да ја набават плочата по промотивна цена, недела дена пред нејзиното официјално објавување.
Истоимениот албум на „Бастион“, една од најблескавите и најпосакувани плочи во македонската музичка историја, оригинално е издаден во 1984 година за ПГП-РТБ, и е единствениот документ за кратката но екстремно слатка соработка помеѓу пеачката и актерка Ана Костовска, музичарот и композитор Кирил Џајковски, басистот Љубомир Стојсављевиќ и филмскиот режисер Милчо Манчевски. Една од првите електронски групи во Македонија, беше прогласена од тогашниот југословенски печат за „Македонска електро-поп сензација“. Четворицата млади артисти за неверојатно кратко време успеаја да снимат зрел, еклектичен и жанровски отворен synth-wave албум со гламурозен поп сензибилитет. Плоча кој се слуша во еден здив.
Бастион со леснотија се движи помеѓу безгрижната, екцентрична поп екстаза и заводливата меланхолија: од вртоглавата еуфорија на „Холивуд“ и „Мистер Комплекс“, преку мрачните електронски пејсажи на „Деца Сунца“ и „Месец у шољи“, па сè до возвишениот мистицизам на„ Молитва“. Сочните и блескави синтисајзерски текстури на Кирил Џајковски, беспрекорниот фанки бас на Стојсављевиќ, експресивниот и страствен вокал на Костовска и луцидната лирика на Манчевски се во совршена симбиоза. 35 години подоцна, останува една од најизненадувачките плочи што некогаш излегле во Источна Европа, која се’ уште звучи свежо и возбудливо.
ACC Records е нова издавачка куќа позади која стои Флора Питроло, а произлегува од нејзината радио емисија A Colder Consciousnees која зрачи од 2011 на Resonance FM (Лондон) и Канал 103 (Скопје). Го отсликува нејзиното континуирано истражување во архивите на поопскурната електронска музика од 80-тите години. Следните изданија вклучуваат претходно неслушнат француски минимал синт саундтрак, романтичен италијански индастријал и клупски ориентирана експериментална електроника од современиот Лондон.
Нема коментари