Македонскиот дизајнер Мите Занов кој стои зад брендот ZANOV подготви нова колекција RESORT ’18 со летни креации кои го спаѓаат во форматот на ресорт колекција. Составена е од 14 модни изгледи, со уникатни дизајнерски парчиња облека, изработени од високо квалитетни материјали како свилен шифон, памучен пуплин, свилен сатен, кепер, штоф, памучни трикоа и жерсе.
Дизајнерот ни откри дека колекцијата е наменета за сезоната лето 2018 и соддржи разновидни дизајни во боја и текстура, костими за капење, лелеави наметки за плажа, долги макси фустани со принт, широки панталони со плисиран транспарентен свилен шифон, како и асиметрични дизајни на панталони и сако фустан. Палетата на бои е карактеристична за ZANOV, употребувајќи јаки бои како жолта, портокалова и циклама, во комбинација со црна, бела и сребрена.
-Појдовна инспирација за колекцијата беа материјалите, леснотијата на материјалите, погодни за летната сезона и убавината на принтовите. За прв пат употребувам повеќе различни принтови во една колекција, кои се предизвик за работа и како целина се создаде еден навистина интересен спој, свеж и разигран изглед – вели Мите.
Исто така за прв пат ZANOV воведува и линија на накит, односно линија на уникатни, рачно изработени обетки, кои совршено го надополнија стајлингот на колекцијата.
Фотографиите и шминката се дело на Елена Андовска, како модел се појавува прекрасната Тамара Петковска од модната агенција Models IN, фризурата е дело на ZANOV, а асистент на фотосесијата е Тони Петрушевски. Фотосесијата е направена во новото студио на ZANOV и на неколку различни локации во Скопје.
Нема коментари