Модната куќа Шанел новата колекција за пролет-лето 2021 ја претстави на своето омилено место за ревија, Grand Palais во Париз, овој пат во сценографијата доминираше големо пано со буквите Шанел, во стилот на легендарниот холивудски знак. Пред самата ревија куќата објави видео со инсерти од неколку француски филмови од 60-тите, најавувајќи дека со колекција ќе оддаде почит на филмската индустрија со која куќата има блиски врски уште од своето основање.
Ревијата за новата колекција претставуваше посвета на многуте филмски актерки кои низ годиниве биле музи на Шанел, уште од 1910 година кога Габриел Коко Шанел ја основа куќата. Некои од нив современите музи на куќата, како Марион Котијар, Ванеса Паради и Лили-Роуз Деп, беа во публиката.
„Размислував на актерките за време на фото-прес, на црвениот килим, во оној момент кога фотографите ги повикуваат, лицето малку им е расеано, ставот малку вон синхронизација со облеката што ја носат, објаснува креативната директорка Виржини Вјар за колекцијата.
Резултатот е младешка колекција на панталони со светки, кратки црни фустани со шлеп од шифон и макси креации со флуидна силуета, карнери и шари со црно-бели цвеќиња.
Покрај препознатливите комплети од букле во бледо розова и црна боја, дизајнерката претстави и шанел-сако во флуоресцентно розова боја, како и џинс-комплети во розова боја, следејќи ја својата желба колекцијата да биде радосна, шарена и живописна.
Колекцијата е дополнета со бројни црно-бели комбинации, елегантни фустани кои може да се носат на црвениот килим, варијации на облеката од твид, младешки и полежерни модели, некои од нив дури и во флуоресцентни нијанси.
Нема коментари