Фото: Ани и Дими
Во камерна и артистичка атмосфера вчера во мултимедијалниот центар „Мала Станица“ со ревиското претставување на Јован Петровски започна десеттото издание на Моден викенд-Скопје. Онака како што започна модната манифестација пред пет години, со претставување на колекција од талентирани дизајнер, така го поздравивме и ова издание на FWSK. Публиката повторно се сретна со неговата дизајнерска игра на белата со црната боја, на машкиот со женскиот принцип, на комплексните кроеви со едноставната линија на модните парчиња.
Јован на вчерашната ревија претстави модели од двете линии за кои што креира, SQUIRE и онаа полуксузната Blackout, машки и женски креации кои навидум се фокусираат на класични и базични парчиња, како строго кроено сако, црни панталони, бела кошула и едноставни маици, но содржат многу посложени кроеви. Јован и во двете линии не само што продожува со својата автентична естетика, туку ја издига на уште повисоко ниво. Во креациите доминира црната боја, која највпечатливо се рефректира во луксузните фармерки и сакоа од Blackout работени со raven wax техника, но има доста и кобалтно сина и бела боја. Дизајнерот прави успешна деконструкција на кроеви што кај машките модели се гледа во необичните ревери на палтата и изместените јаки на кошулите, а кај женските во мултиплицирањето и одземањето на одредени елементи на кошулите од кои повеќето имаат неконвенционални интервенции во задниот дел.
Силуетата и атмосферата за време на ревија не потсети на Хеди Слимановскиот манир, но без да реферира на позајмување идеи, бидејќи она што вчера Петровски го прикажа е автентичен израз што тој подолго го негува и во кој се вткаени монохроматика, минимализам, геометрија, игра со форми и елементи на панк-рок. Петровски не прави компромис со модните тенденции, но успева да создаде парчиња кои се во духот на времето, носливи и крајно современи. Дизајнерот прикажува минимализам, но сепак комплексен. Прикажува концептуалност, но која може да се носи.
Долгогодишниот пријател и соработник на Петровски, музичарот Сашко Костов, подготви и во живо изведе музиката специјално за вчерашната ревија, а накитот на Јана Ацевска од „Капка“ ја надополни модернистичката приказна на дизајнерот. Одлични беа и манекените и манекенките кои ја износија ревијата со брзо темпо, што е невообичаено за македонски, но практика за светските ревии, а успешен беше и нивниот минималистички стајлинг. Поголем дел од моделите од SQUIRE и одередени парчиња од Blackout ќе се најдат на продажба во концептуалната продавница Lotus Design Store.
Јован Петровски подолго време беше присутен на домашната модна сцена, а пред четири години замина за Банкок, каде што предава неколку предмети на тајландската филијала на „Академија Италијана“, а во меѓувреме стана декан на одделот за мода во оваа модна школа. Токму во Банкок го основа брендот SQUIRE, а нешто подоцна го развива во соработка со The Blackout Crew, со кои се спои и на тајландскиот бренд за џинс Blackout. Желба и план на Петровски е двете линии во кои е креативно инволвиран да прераснат во глобални модни брендови. (К.Т.)
Фото: Stylist.mk
Фото: Ани и Дими
Нема коментари