Почнаа претставувањата на колекциите за сезоната есен-зима 2019/20, прва на агендата е модната недела во Њујорк и ревијата на Том Форд во стартот. Навикнати на неговиот сексапилен стил, Форд во новата колекција прикажа еднa воздржана и скоро конзервативна стилска слика, во која преовладува елеганција, ненаметливост и смирен гламур. Дизајнерот претстави машки и женски креации, а доминираат повеќе верзии на костуми со панталони, сатен и кадифе, пастелни тонови и неколку модели во интензивни црвени и виолетови нијанси, помека естетика и претежно машки кроеви, а во финалето долги фустани со синџири како детали.
Форд се обраќа и на актуелната американска политика, нетрпеливоста на светот кон владеењето на Трамп и негативноста со која се соочува целиот свет, а колекцијата ја нарекува „потрага по безбедност”. Тој по ревијата ја објасни смиреноста на креациите: „Никогаш не сум бил од оние дизајнери кои зборуваат за моменталното време, како тоа влијае на она што го креирам, но, сепак, не можете да ги игнорирате вестите. Се чувствувам фрустрирано, вознемирено и исцрпено. И затоа не сакам да носам ништо предизвикувачко или агресивно“.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари