Македонскиот креатор Ненад Секирарски во петокот одржа ревија на манифестацијата Fashion Show во Славонски брод. Дизајнерот, кој минатата година одбележа две декади од својата работа, одушеви со избор од своите последни три колекции. Станува збор за моден настан, кој се одржа на 4 и на 5 септември, на кој се претставија петмина креатори од Македонија, Србија, Босна и Херцеговина, Словенија и Данска. Првиот ден беше само музички во кој настапија Неда Украден и Младен Грдовиќ, а вториот ден беше ревијалниот дел каде секој дизајнер се претстави со својата работа по што следеше концер на Жељко Јоксимовиќ.
Хрватскиот топ-модел Кристина Лумбар се појави на ревијата на Секирарски
-Учествував на настабот по покана на организаторите и со посредство на една од топ-манекенките на хрватската модна сцена Кристина Лумбар, која е моја долгогодишна пријателка. Идејата беше секој дизајнер да ја претстави својата работа, а не само да ја промовира последната колекција. Затоа се одлучив за еден колаж од моите последни три колекции, од кои избрав 17 модели. Целиот настан протече прекрасно и сите бевме многу задоволни. Организаторите во вистинска смисла се потрудија да се чувствуваме како ѕвезди, организирајќи го на достојно ниво нашиот престој од почеток до крај. Исто така уште една прекрасна манекенка со која имав можност да соработувам во оваа прилика е и Маја Лена Лопатни, инаку ќерка на познатата Миа Беговиќ и учесничка на „Преживеан“, која навистина допринесе целото шоу да изгледа прекрасно-вели Секирарски.
По успешните претставувањата во Белград и Скопје, ова е прва ревија на нашиот дизајнер во Хрватска.
- Хрватска е многу интересен пазар. Оваа ревија беше само тест за да можам да се уверам како тамошната клиентела би реагирала на моите дизајни и мојот стил на работа-додава тој.
Секирарски е актуелен со колекцијата „Одмазда на женски начин“, која премиерно ја претстави во Белград на своето 15-то учество на модната недела Fashion Selection. (А.Н.)
Нема коментари