Во автентична есенска атмосфера, на писта распослана со пожолтени лисја и во носталгичен ритам на 70-тите, дизајнерката Тања Кокев вчеравечер во „Александар палас“ ја промовира новата ready-to-wear колекција за есен-зима 2017/18. Ревијата ја почна со емотивна посвета на својот неодамна починат татко, и продолжи со сентиментално патување низ спомените, обидувајќи се најважните да ги заштити од избледување и заборав. Во тој манир, нејзината модната временска машина трагаше по највпечатливите кроеви, тонови и форми од 70-тите, кои во новата колекција ги прилагоди на потребите на современата жена, облекувајќи ја за секоја пригода, секоја доба и секоја улога што ја има во текот на денот.
- Оваа колекција ја посветив на посебноста на секој од нас. Се навратив на модата и општо идејата на 70-тите кога начинот на облекување рефлектира став во изразувањето, индивидуалност базирана на природен изглед и различност. Навистина се залагам за различност и во изгледот и во комбинациите, за излегувањето од матрицата во која сите изгледаат исто и за слободата на изразување. Затоа оваа колекција е послободна, со вариетет на комбинации од материјали и форми кои уште повеќе ќе дојдат до израз при комбинациите на индивидуалците кои носат „Кокев“. Всушност и се инспирирав од тоа како сè ги комбинираат парчињата на ready-to-wear оние кои носат мои модели. Секако, повторно ги користам дизајнерските материјали препознатливи за мене за да го одржам квалитетот. Специфично овој пат е дека во колекцијата вметнав исклучиво црни и сребрени вечерни тоалети, како контраст на шаренилото на останатата колекција и дека за прв пат изработивме и машки модели. Тоа е чекор кој сè уште го правам срамежливо, но се надевам дека може да прерасне во нешто поголемо – вели Кокев.
Креаторката направила комбинација на разни форми, спојувајќи ги строгите линии на класичниот дизајн со асиметрични отскокнувања, кои ѝ даваат полетност и уникатност на линијата. Сличен е пристапот и во комбинацијата на материјали и тонови. Референци со 70-тите имаше во целосниот стајлинг на моделите и во слободно пуштените фризури со волумен.
Во неколку кратки поглавја погледнавме креации за деловен изглед, за коктел-забави, разни свечености, но и машки модели – што е новина во работата на нејзиниот бренд. Иако страмежливо, сепак машките креации на Кокев соодејствуваат со модното освестување во 70-тите години. Тоа е период кога се напушта стереотипот на мажественост со крути, еднолични и широки материјали и кроеви, и се оди кон посмела мода, со тесни, шарени и поиндивидуални креации. Машките костуми на „Кокев“ се со актуелната ситна каро шара, со едноставен, но ефективен микс со црна или кафена ткаенина, и ногавица од панталони која завршува со ластик. На нозете машките модели носеа и влечки со крзно.
Вчеравечер Тања повторно покажа добар слух за професионално организирана ревија, поставувајќи стандадри и критериуми кон кои треба да се движи нашата модна сцена. Тоа подразбира и соработката со искусен тим. Режијата традиционално беше на Дејан Пројковски, сценографијата на Сергеј Светозарев. За музичкиот избор се погрижи диџејката Соња Исмаил, која ја наметна динамиката по која се движеа моделите пред бројната публика во салата: модните новинари и фотографи, познати лица од театарот, музиката, модата и бизнисот, почнувајќи со нумерата The Age of Aquarius од хит-мјузикот од 70-тите „Коса“, па сè со Voulez-Vous од АББА со кој кулминира шоуто. Во финалето на ревијата манекените спонтано заиграа, а во тоа им се придружи и самата Тања Кокев, која покажа дека секое патување низ времето секогаш завршува во најдобриот момент за живеење, креирање, сакање и споделување – сегашноста!
Фото: Ани и Дими
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари