Ревијата на „Фенди“ со посвета на Карл Лагерфелд

По веста за смртта на модниот креатор Карл Лагерфелд беше очигледно дека посебно внимание на Миланската модна недела ќе привлече претставувањето на „Фенди“, италијанската модна куќа за која тој дизајнираше од 1965 година. Колекцијата за есен-зима 2019/20 е последната со Лагерфелд како дел од брендот, а креативната парнерка Силвија Вентурини Фенди изјави: „Врската помеѓу Карл и „Фенди“ е најдолгата љубовна приказна во модата, која ќе продолжи да ги допира нашите животи во годините што доаѓаат“. На крајот од ревијата брендот му оддаде почит на дизајнерот кој креираше за компанијата на семејството Фенди цели 54 години со кратко видео и со пораката Love KL. Исто така објави и видео во кое Карл скицира и раскажува што носел првиот ден на работа во „Фенди“. А во негова чест на облеката беше отпечатен монограмот FF, односно логото наречено Karligraphy кое Лагерфлед го дизајнирал во 1981 година. Новата колекција на „Фенди“ е ревизија на стилските класици, интерпретирани со женствена кроеви и во неутрална палета која е разиграна со тиркизна и жолта. Манекенките носеа палта со дефинирани раменици, плисирани здолништа и мрежасти креации, а презентираа и нова доза на чанти по кои е брендот меѓудругото препознатлив.   *Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.