На десетина дена од емитувањето на телевизиската серија од новата сезона на American Crime Story, која се однесува на убиството на италијанскиот моден креатор Џани Версаче, неговата сестра Донатела изјави дека нема да ја гледа, а целото семејство смета дека дејствието е далеку од вистината. „Семејството Версаче во ниту еден момент не ја одобри, ниту пак учествуваше на каков било начин во снимањето на серијата за смртта на Џани. Бидејќи Версаче не ја одобри книгата на која е делумно заснована, ниту учествувашe во пишувањето на сценариото, оваа ТВ серија треба да се смета само како дело на фикција“ стои во официјалната изјава на семејството.
Пред оваа, семејството не даде официјален став за серијата, но, како што рече продуцентот Рајан Марфи минатиот август, сестрата на Џани, Донатела, разговарала со него и ја споделила својата загриженост во врска со серијата. “Мислам дека го испочитувавме неговото семејство, особено Донатела која што имаше неколку барања за тоа како ќе бидат портретирани нејзините деца. Како татко ги сфатив и од почит кон неа ги прифатив“, вели Марфи.
Џани и Донатела Версаче после една ревија во 90-тите
Актерката Пенелопе Круз, која ја игра Донатела, вели дека зборувала со неа пред да почне да се снима серијата, имале долг разговор, но нема да открива детали за што разговарале. „Мислам дека таа знае дека според начинот на кој ја играм, јас навистина ја сакам и ја почитувам“. Пенелопе за Vogue откри „Се надевам дека кога ќе ја погледне серијата ќе биде среќна. Сигурна сум дека има сцени што ќе ѝ бидат тешки да ги гледа, бидејќи се работи за загубата на нејзиниот брат, кого секаго го почитувам. Улогата ја подготвував со многу љубов“.
Пред извесно време реагираше и Антонио Д’Амико, долгогодишниот партнер на Џани Версаче кого во серијата го глуми популарниот пејач Рики Мартин, кој изјави дека продуцентот Марфи воопшто не го консултирал и дека тој доста ја користел фантазија во раскажувањето за неговиот однос со Џани.
Едгар Рамирез како Џани Версаче
Серијата се базира на книгата Vulgar Favors напишана во 1999 година од страна на Морин Орт, колумнистка на Vanity Fair. Семејството се буни дека некои сцени се апсолутно неточни, но исто така треба да се има предвид дека се работи за телевизиска серија, а не документарен приказ. Пред неколку дена екипата од серијата одржа премиера во Холивуд. Се собраа продуцентот Марфи, и главните глумци Едгар Рамирез (Џани во серијата), Пенелопе, Рики и Дарен Крис кој го глуми убиецот на Џани. Пенелопе на премиерата не беше облечена во модел на „Версаче“.
Дарен Крис, Пенелопе Круз, Едгар Рамирез и Рики Мартин на премиерата на серијата пред четири дена
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари