Младиот дизајнер Димитар Бабков по дипломирањето моден дизајн на ФОН и откако во последниве пет години работеше во модната индустрија за некои од најголемите имиња, одлучи да го оформи својот бренд Son of Salome и под тоа име да ја претстави колекцијата „Деветтиот круг“, која е продолжение на концептот за кој што долго истражуваше и работеше, а вбројува уште две колекции – „Танцот на седумте превези“ и „Осмиот вел“.
-Деветтиот круг (ден) е колекција направена со многу емоции. Инспирација доаѓа од драмата „Саломе“ на Оскар Вајлд, библиска приказна поврзана со погубувањето на Јован Крстител. Со еден танц младата девојка го добива тоа што го посакува, а тоа е главата на Јован Крстител на сребрен послужавник. Пореметување на основните човечки вредности е главниот акцент и порака на колекцијата, како и целиот концепт на брендот Son OF Salome – вели дизајнерот.
Бабков во колекцијата ги обработува темите на соголување на човечката внатрешност, емоционална нестабилност, љубов, болка, страв, безличност и животниот циклус, и симболично ги прикажува низ форми, бои и кроеви. Голем дел од колекцијата вклучува рачна доработка како везени и плетени детали, а дел од ткаенините се од рециклирани материјали.
За да ја промовира колекцијата подготви моден едиторијал, во чија изработка беа вклучени Мартина Шалова Чешновар како фотограф, манекенката Веда Евтимова („Моделс ин“), шминката е на Миа Араби, фризурата на Елена Николовска, а дизајнерот се заблагодарува и на Мите Занов и Емил Поповски.
Нема коментари