Некои сосема едноставни и класични, а некои сосема неочекувано се појавија на модните писти на ревиите за пролет-лето 2014 и се претпоставува дека ќе станат дел од најважните тенденции за овој период.
Плисирано здолниште
Тренд: Било да е транспарентно, металик или кул бело, ситно набраното здолниште сега проектира заводливост. Како да го носите: Малку поневообичаено и понекогаш со стилски недолседности, на пример, на модната писта кај „Диор“ го видовме комбинирано со спортски мрежест топ. Дозволени се микс со кежуал маици и волуменозни блузи или дуксери, а може да се сретне плисирано здолниште со асиметрична должина. На модни писти: „Диор“, „Селин“, „Ланвин“.
Пастелно палто
Тренд: Пролетно палто или мантил со нежни нијанси како лаванда-виолетова, минт-зелена или бебешко сина боја. Како да го носите: Наметнете го врз деловната облека, врз лесен фустан или комбинирајте го со џинс и маичка за понеформална пригода. На модни писти: „Миу Миу“, „Бурбери“.
Кошула со панделка
Тренд: Класичните кошули стануваат поженствени со нежната панделка околу вратот. Како да го носите: Избегнете го класичниот изглед така што кошулата ќе ја комбинирате на непредвидлив начин, на пример со леопардово здолниште по примерот на „Валентино“. На модни писти: „Валентино“, „Ланвин“.
Дворедно сако
Тренд: Откако на дечковците им ги украдовме широките фармерки, време е да им го позајмиме и сакото, па во пролетната гардероба да го вметнеме дворедниот блејзер во денди-стил. Како да го носите: Најшик комбинација е сако, трендовски широки панталони или фармерки, маичка, и додатоци како сандали со високи потоетици и впечатлив накит. На модни писти: „Вионе“, Ралф Лорен, Мајкл Корс.
Висечки обетки
Тренд: Впечатливиот ѓердан се заменува со впечатливи обетки, кои се масивни и во форма на старински лустери. Како да го носите: Слично како и крупните ѓердани, како масивен детаљ кој е контрастен на сива кашмирна блуза, спортски дуксер или класична бела кошула. На модни писти: „Ланвин“, Долче и Габана.
Фустан со тенки прерамки
Тренд: Популарни во 90-тите беби-дол фустаните со тенки прерамки повторно се актуелни, а сега се направени од тантела, проѕирни ткаенини и свила. Како да го носите: Стилистите велат на благородничко-авангарден начин што би значело фустан со секси сандали и раскошен накит заокружено со моторџиска јакна. На модни писти: Стела Макартни, „Миу Миу“, Вера Ванг.
Ранец
Тренд: Не како школски прибор, туку како моден став со кој се продолжува спортско шик влијанието во новите тенденции. Како се носи: Покрај спортски комбинации, на пример како со овој краток топ на ревијата на „Шанел“, модните куќи претставија и кожени ранци наменети за вечерни пригоди. На модни писти: „Шанел“, The Row, „Живанши“.
Ортопедски сандали
Тренд: Секоја сезона постои барем еден „грд“ тренд кој тешко поминува кај пошироката публика, а го промовираат повеќето брендови. Таков е случајот со сандалите со ортопедски изглед кои доаѓаат во различни бои и детали. Како се носи: Со разиграни фустани и здолништа со А-линија, никако со шорцеви, освен ако не сакате да изгледате како скандинавски турист. На модните писти: „Прада“, „Марни“, „Ланвин“, Долче и Габана, Џамбатиста Вали.
Нема коментари