Секако дека големите реви-спектакли се интригантни и интересни, но малите камерни претставувања особено на посебно избрани локации се најчесто магични. Особено ако е тоа место од типот на музејот Багати Валсечи, кој се наоѓа во срцето на Милано и е еден од најисториските и најживописни места во Милано, сопственост на фамилијата Багати кои во својот дом од средината на 19 век го претвораат во значаен музеј со импресивна колекција на уметнички дела, мебел, и таписерии од периодот на италијанската ренесанса. И особено кога сте послужени со чаша шампањ на влезот во тој исклучителен амбиент.
Една совршена локација за доловување на атмосферата на аристократска префинетост со која дише последната колекцијата на дизајнерката Луиза Бекорија за сезоната есен-зима 2014/15, по која таа прочем е препознатлива и барана од највисоките општествени кругови, но и од безброј холивидски звезди, од Анџелина Џоли до Мадона.
Луиза Бекорија е современ романтичар која својата уметничка визија ја црпе од низата на културни искуства споена со бујна имагинација, но и својот сопствен животен стил (нејзиниот сопруг е сицилијанскиот аристократ Лучио Бонакорси). Резултатот е бајковиден исказ кој е воедно и гламурозен и елегантен и женствен. Меки нежни колорити, луксузни материјали, сензуални форми, посебни детали, комбинирано со препознатливиот екстравагантен шик оформуваат посебна аура од префинета привлечност на нејзините парчиња облека. Тоа и не зачудува ако се знае за нејзиното искуство како кутуриер.
Колекцијата на Луиза Бекарија за следната сезона е инспирирана од современата жена сонувач во потрагата по префинета привлечност со кутур-детали. Формите произлегуваат од точни истражувања: структурална облека со текстури која создава флуидност додека пропорциите наложуваат елеганција и самосвест. Доминантните миди и макси должини на моменти се разбиваат со мини здолништа се како говор на женственоста.
За ден, жената кај Луиза Бекорија преферира здолништа и палта, убави принтови и украсени свилени сатени. Твидот во меѓувреме е збогатен со вметнати детали и сјајни апликации. Техничките ткаенини како „алкантрара“ стануваат се помодерни благодарение на тридимензионалните апликации.
Фустаните во пудрести нијанси играат помеѓу светлото и сенките со плисе-ефект исцртувајќи нови силуети. Коктел фустаните се исполнети со светлина со филигрански тантели – реминисценција на скапоцените златни уметнички дела од ренесансата. Во појавата на вечерните изгледи, формите стануваат уште подефинирани. Жената кај Луиза Бекарија е самоуверена со романтичен дух.
Колор палетата во колекцијата е нежна: со нијанси од сива, пудресто розова, и боја на модра слива. Во вечерните комбинации колоритот од нијанса на слонова коска и крем е допрен со златно, црно и морнарско сино кое е насекаде.
Музата на оваа колекција на Луиза Бекарија е девојката сонувач, елегантна и префинета. Моделките прикажуваат везови, украси, ткаенини и кроења совршено прилагодени на фустаните. Концептот на оваа колекција е истражување на флуидната, романтична и принцовидна елеганција.
Крајот на ревијата се трансформира во серија на прикази во музејските соби, претворајки ги во совршени фотографски сетови. Помеѓу антиквитетната дрвенарија и скапоцените ќилими, помеѓу камините и балската соба, по ревијата моделите креираат вид на tableaux vivants (жива слика), па имате шанса сосем непосредно да ги доживеете декорациите на фустаните, скапоцените материјали и совршената изработка. И да заминете зашеметени од сето тоа заедно.
Нема коментари