Најновото издание на реномираниот Танц Фест ќе се одржи на почетокот на септември под мотото „Потрага по допир“. Танц Фест 2020 ќе го одбележи јубилејот 30 години современа македонска танцова сцена со учество на македонски и американски уметници, со поддршка на Министерството за култура, Град Скопје, Американската амбасада во Скопје, како и долгогодишните партнери на фестивалот.
„Исклучително сум задоволна, што и покрај целата ситуација, успеваме да го организираме Танц Фест, кој годинава ќе се одвива под мотото „Потрага по допир“ и се надевам дека нашата публика ќе ужива во современите танцови креации на македонски и американски уметници. Со цел да го намалиме ризикот од можни компликации во однос на КОВИД-19, се одлучивме за Танцов маратон, што за нас, во организација е исклучително напорен потфат, но сепак сакаме да ѝ го дадеме најдоброто на нашата публика, тука и надвор од земјава. Целата програма ќе се пренесува онлајн, во живо и сметам дека на овој начин ќе допреме и до нова, поширока домашна но и интернационална публика“, вели Рисима Рисимкин, уметнички директор на фестивалот.
Меган Бриџ
За првпат годинава фестивалот во својата програма има фокус на една земја, односно започнува со програмата „ФОКУС:САД“ во која ќе бидат претставени пет реномирани американски кореографи. Оваа програма се одржува во соработка со официјалниот партнер на фестивалот, американската фондација „American Dance Abroad“ со седиште во Њујорк и е поддржана од Американската амбасада во Скопје. Дел од кореографите ќе бидат присутни во Скопје: Меган Бриџ, танчерка, кореографка и продуцентка којa работи и твори во Филаделфија, ко-директор на „Фиџет“, платформа на која соработува и која заеднички ја развива со композиторот, дизајнер и музиколог Питер Прајс и Кристин Бонанси, американско-европска танчерка и кореограф, со дваесетгодишно меѓународно искуство во конципирање, режија и кореографија и изведување дела базирани на движење, уметнички директор на компанијата Кристин Бонанси, основана во 2010 година. Дела на познатите кореографи Стивен Петронио, Шамел Питс и Даг Верон ќе се прикажат во рамките на фестивалот онлајн.
Ударниот дел од програмата на фестивалот ќе се одржи во живо, во форма на Танцов маратон на 4. и 5. Септмеври, со почеток во 20:00 часот, на отворената сцена на Танц Фест 2020 во парк МКЦ, додека другиот дел публиката ќе може да го проследи онлајн, преку Јутјуб каналот на Танц Фест, а воедно и на неколку регионални и национални телевизии. Програмата на Танцовиот маратон онлајн ќе се пренесува на повеќе пунктови, портали и фондации во Европа и САД.
Стефанија Гаштарска
Манифестацијата ќе прикаже петнаест кореографии, покрај веќе споменатите американски кореографи, учество ќе земат и домашните уметници: Адријана Данчевска, Валентино Апостоловски, Ивана Коцевска, Дејан Битровски, Ивана Балабанова, како и апсолвентите на Универзитетот „Гоце Делчев“ – Бобан Русески, Тереза Лазарев и Сара Цветковска во соработка со студентите дизајнери Катерина Димитровска и Магдалена Димковска, кои костимите ги создаваат под менторство на професорката и дизајнерка Лидија Георгиева, од ТМФ, УКИМ.
Танцовиот маратон ќе се отвори со јубилејната претстава на Рисима Рисимкин „Идентитети – Историја на еден растегнат сон“, а за првпат ќе биде прикажан и танцов филм од домашен автор – филмот „Дома“ на кореографката Адријана Данчевска, која таа го оствари во соработка со визуелниот уметник Ивана Мојсовска, и со Марко Марјановиќи Тео Ангеловскикако камермани.
Фестивалоти годинава ќе посвети внимание на најмладите, со Отворената програма – Танцуваме со Виталија, во која ќе се одржат повеќе работилници за современ танц, предводени од американските кореографи Меган Бриџ и Кристин Бонанси, кои ќе работат со професионални и полу-професионални танчери. Во оваа програма ќе настапат танцови студија од повеќе градови од земјава, а ќе биде прикажана и програмата „Во светот на американскиот современ танц“ со проекции на претстави од извонредни американски кореографи.
На отворањето на 4-ти септември, во рамките на Танцовиот маратон ќе биде доделена наградата „МЕНАДА за врвни достигнувања во областа на танцот“ на американската танцова легенда, госпоѓа Џоан Мајерс Браун.
Оваа година, со големо задоволство, ве информираме дека престижната награда „МЕНАДА за млад уметник“ свечено ќе ѝ биде доделена на Стефанија Гаштарска, првата македонска балерина која доби професионален ангажман и стана дел од ансамблот на рускиот „Болшој“ театар во Москва.
Влезот на фестивалот ќе биде слободен, но со ограничен број на места, заради почитување на протоколите и мерките донесени од страна на надлежните.
Нема коментари