Вториот ден на актуелниот Моден викенд-Скопје го отвори ревијата на студентите од Институтот за дизајн и инжењеринг на облека на Технолошко-металуршкиот факултет при УКИМ во Скопје, кои настапија под менторство на дизајнерката Лидија Георгиева. Под името „Ритам и наука“, на модната писта во Скопје Мериот Хотел претставени беа дел од студентските колекции, кои премиерно беа прикажани на традиционаналната модна ревија што се одржа во јуни годинава. Ревијата започна со балетски танц кој се снимаше со дрон, додека во позадина тројца идни биотехнолози нешто „подготвуваа“.
-Со желба за иновација и позитивна енергија, студентите од насоката за Дизајн и текстилно инженерство, заедно со студентите од катедрата за Прехранбена технологија и биотехнологија, соработуваа во кондензација на заедничките идеи. Ритамот беше клучна инспирација за 3Д одпечатоци, мириси, вкусови, дизајн на облека, дизајн на храна, фотографија. Сите сетила беа вклучени во процесот на работа – Ритамот е вибрација, бран, движење, звук, пулсирање. Денес, повеќе од секогаш дизајнот и технологијата се тесно поврзани, па иднината е токму во продолжувањето на таа соработката од која континуирано постои можност за нови идеи – вели дизајнерката Лидија Георгиева.
Нејзините студенти и идните модни креатори покажаа своја авторска визија која треба понатаму да се развива. На главната инспирација – ритамот, тие креираа модели во кои се забележува експериментирање, играње со формите, начнување на идеја од која во иднина ќе треба да се градат цели колекции. Видовме разни брановидни форми, везени детали, футуристички референци, принтани материјали, необичен накит, прамени од коса наместо ткаенина, 3Д-облици, романтични, но и поавагарни креации.
Нема коментари