Вториот ден од Моден викенд-Скопје за сезоната есен 2018 започна со модната инсталација и перформанс од финалниот дел на проектот #sustainablestorymk, а модниот ден во Скопје Мериот Хотел финишираше со ревијата за колекцијата Full of Grace на брендот „Алшар“.
АЛШАР
Колекцијата Full of Grace на дизајнерката Силвија Михајловска поддржана од Amstel, инспирирана од пејачката и стилска икона Грејс Џонс, соджи 30-тина креации во стил на рок шик гламур. Со оваа колекција дизајнерката слави десет години од постоењето на нејзиното ателје „Алшар“, како и 20 години од својата прва самостојна ревија на ФЛУ. На музиката на Грејс Џонс видовме креации во кои доминира црната и бакарната боја, припиени и асиметрични форми, референци на стилот на Грејс, гламур од 80-тите со тесни и светкави мини фустани, впечатлив принт кој е микс на анимал и на африканска шара, кодови препознатливи за дизајнерката како деконструкција преку кроевите, долги појаси во разни фуункции, нитни и патенти. Дел од креациите се рачно прскани со боја, а на некои има шари насликани од Ива Креатива. Изгледот е дополнет со body paint на Бојан Ковски, и чизми и чевли специјално направени за ревијата од страна на Shevro.
ИРИНА ТОШЕВА
Со нетипичен моден перфроманс дизајнерката Ирина Тошева ја презентираше колекцијата за есен-зима 2018/2019 . „Гепардот својата енергија ја согорува од срцето. Повремено зрачи како страсна супернова. Го чека вистинскиот момент и никогаш не се откажува. Колку сила и енергија им даваш на другите? Веруваш ли во својата истрајност да го заштитиш она што е твое, тогаш кога е најважно?“ праша Тошева низ новите креации
ТЕОДОРА МИТРОВСКА
За прв пат на Моден викенд Скопје ги видовме моделите на дизајнерката Теодора Митровска од колекцијата We Are Not Machines со која беше дел од неодамнешното отворање на модната недела во Рига. Колекцијата е инспирирана од текстилни работници и е критика на брзата мода и условите во кои истата се произведува. Преку креациите се преиспитува тенката линија помиѓу човек и машина по која, за жал, многу од овие работници се движат. За оваа цел во колекцијата се среќаваат парчиња од неконвенционални материјали како ПВЦ, индустриска гума и цврста пластика кои го трансформираат телото во надчовечко.
КРЕНАРЕ РУГОВА
Пред македонската публика за прв пат беа презентирани и модните парчиња на Кренаре Ругова кои се „изработени користејќи бавна мода за да претстават нови форми на размислување однапред“.
#sustainablestorymk
На капсулните колекции изработени од текстилен отпад работеа Емануела Трајческа, Сара Реџиќ, Ева Зарезанкова, Натали Наумова ,Радица Лазова, Катерина Димитровска, Мирјана Јосифоска и Дана Ќосева под менторство на дизајнерката Ирина Тошева и гостинките од Велика Британија односно талентираната дизајнерка Ана Скодбо и една од водечките британски стилистки Ребека Рој. Гостинките кои долго време работат на одржлива мода, на младите дизајнери им предаваа за техниките за бавно производство, одржливи ткаенини, сертифициран органски памук, производство на нула отпад, вегански материјали и етички услови за производство. На модниот перформанс манекенките ги носеа чевлите од „Schuster“.
Целиот проект го реализираше Моден викенд Скопје со несебичната поддршка од Македонско Модно Здружение, Министерството за економија на РМ, Министерството за култура на РМ , Британскиот совет како и партнерите „Текстилното трговско здружение- Текстилен кластер –Македонија“ во соработка со фабриките „Okitex“, „La dama“, „Bella“, „AFG“ и „Istkomerc Sanda“, „Monika“ и „Fjer“. Активно учество и поддршка дадоа и граѓанската мрежа „АјдеМакедонија!“, „Екотип” како и Академијата за моден дизајн „Џолев и уметностите“ и „Сивус едукативен и развоен центар“.
Моден викенд-Скопје продолжува и вечерва со модна ревија на студентите од Академијата за моден дизајн „Џолев и уметностите“ и „Сивус едукативен и развоен центар“, италијанскиот накит „SIGMA jewelry“, „Matrons dresses“ и Олгица Ѓоргиева поддржана од „БИСИ“,„Soul Kitchen Bar“ и „Bella Vista“.
Нема коментари