Дизајнерката Ирина Тошева вчеравечер во „Скопје Мериот Хотел“ во финишот на есенското издание на Моден викенд-Скопје со ревија за новата колекција го заокружи своето десетто претставување во рамките на оваа модна манифестација. Колекциите на Ирина секогаш се базираат на еден впечатлив принт, некогаш тоа се забрите, сино-виолетовите слики кои потсетуваат на морска шир или куќитете пресликани од делата на сликарот Ване Костуранов, овојпат тоа е живописна шара која потсетува на илустрациите од приказните за жар-птицата. Таа жар-птица од словенскиот фолклор е главната инспирација за дизајнерката, а потрагата за изгубениот пердув од приказната ја поттикна да се впушти во сопствена потрага поо својата визија за креациите креирани за сезоната есен-зима 2016/17.
„Инспирацијата е жар-птицата како мотив во приказните од словенскиот фолклор. Оваа волшебна птица што сјае и доаѓа од далечна земја е и благослов и носител на несреќа на оној што ќе ја фател… Нејзината потрага е пресликана во новата колекција. Сите имаме по некоја „своја“ жар-птица. Од нас зависи дали ќе ја заробиме или пуштиме слободно да лета. Оваа сезона повторно се навраќам на боите, а природните материјали, удобноста и практичноста остануваат клучни нешта во мојот дизајн“, ни откри дизајнерката.
Тошева со оваа колекција прави резиме на различни елементи од својата досегашна дизајнерска работа, а и повторно се навраќа на креирање со многу јаки бои. Пердувите на жар-птицата зрачат црвена, портокалова и жолта светлина, покрај овие бои таа вметнува и темносина, неколку нијанси на зелена и виолетова. Боите се употребени во манир на колор-блок или во комбинација фустани и здолништа со експресивен принт, како највпечатлив дел од колекцијата.
Нема коментари