Специјалната колекција радијатори Drop (Капка) на Завар Дизајн е првонаградена на германските дизајнерски награди German Design Award 2020 во категоријата Excellent Product Design Energy
Дизајнот на Drop (Капка) грејните тела е потпишан од тандемот Марта Наумовска Грнарова од Завар Дизајн и Јана Ацевска од Капка. Наградената колекција е дел од приказните за животната линија од Завар Дизајн и Марта Наумовска Грнарова и е создадена со трансформација на колекцијата на накит на дизајнерка Јана Ацевска во колекција на радијатори. За домашната сцена, наградената колекција беше изложена на Skopje Design Week 2019.
Во изјавата на жири комисијата на German Design Award 2020 како образложение за наградата стои дека „радијаторите се прикачени на ѕидот како уметнички дела, што ги прави извонредни и привлечни за окото. Тоа е интересен дизајнерски пристап којшто го толкува концептот на греење на нов и, пред сè, необичен начин.”
„Ова признание е највисоката и најреномираната потврда за вредностите на дизајните на Завар внесени и во колекцијата Капка. Уверувањето доаѓа од земјата и школите каде е роден индустрискиот дизајн, каде е создадено Баухаус движењето. Затоа Германската награда за дизајн има огромно влијание и директен придонес за целокупниот комерцијален успех. Во ова натпреварување влегуваат и се разгледуваат единствено проекти кои навистина претставуваат пионерски чекор во функционалниот дизајн, така што ги идентификува и претставува најуникатните трендови во дизајнот – тоа е натпревар кој ја промовира дизајнерски ориентираната сцена“, вели Марта Наумовска Грнарова, генерален директор на Завар Дизајн.
Колекцијата Drop (Капка) што Завар Дизајн ја претстави во Германија, е составена од уникатни дизајнерски, рачно изработени радијатори во три капковидни форми коишто функционално се обединуваат и овозможува 13 елементи да бидат комбинирани на безброј начини. Оваа карактеристика му овозможува на корисникот единствено искуство да биде вклучен во процесот на креирање и прилагодување на секојпат различно и уникатно парче уметност за греење. Грејните тела на Завар се резултат на способноста на компанијата да интегрира нови технологии со единствен дизајн. Процесот на производство се заснова на еколошки технологии, со минимална потрошувачка на енергија и природни материјали со висок квалитет, што ги прави производите 100% рециклирачки.
На добивањето на ова значајно признание, претходеше номинацијата од страна на German Design Council, што веќе е своевидна награда и со што колекцијата Drop (Капка) влезе во изборот за German Design Award 2020 во категоријата Excellent Product Design Energy. Резултатите од гласањето на жирито беа објавени на 22 ноември годинава, а свеченото доделување на наградата ќе се одржи во Франкфурт на 8 февруари 2020 година.
Завар дизајн постои повеќе од 30 години на пазарот, како компанија која произведува исклучителни решенија за радијатори што се издвојуваат со квалитетот и дизајнот, драстично разликувајќи се од другите конкурентни производи. Решенијата на Завар Дизајн се наменети за клиенти кои го ценат квалитетот, занаетчиството и дизајнот, во нашата држава и глобално. Предводени од идејата дека дизајнот напредува во подобрување на квалитетот на животот, Завар дизајн создава тела за греење кои ги надминуваат сите очекувања во индустрискиот стил. За својата работа ја има добиено и наградата за најиновативен дизајн на Американската асоцијација на дизајнери на ентериер – ACID New York Metro, во 2017 година.
Нема коментари