Неколку илустрации на креативката Вања Штркова сeга може да бидат дел од вашиот простор, благодарение на соработката на оваа илустраторка и графичка дизајнерка со студиото Dagg. Три колоритни и еден црно-бел мурал наречени Dig og mig, Björn, Kvinde и Hjerte ја сочинуваат авторската колекција на Штркова за Dagg, студио кое после соработката со Нина Симовска може да добие пофалба за ангажирањето на домашни автори во малку поинаков дизајн.
-Dagg е една фантастична мала фирма која се бави со дизајни, печатење и монтажа на илустративни ѕидни решенија. Ме забележаа на социјалните мрежи и ми се јавија за соработка – ни откри Вања за тоа како се здружила со Dagg.
Нејзините ѕидни илустрации веднаш привлекуваат внимание, а Вања вели дека соработката повеќе е на неопределено, не е само еднократен проект. Таа смета дека во иднина и други нејзини илустрации кои ќе бидат понудени преку Dagg.
-Како за прв пат почнавме со нешто кое веќе го имав како илустрација за да пробаме. Решивме илустрациите кои ги имам до сега, секако одбрани, да видиме како би изгледале на голема површина. Инспирацијата за илустрациите е секаде околу мене. Најмногу се парови, но жената ми е секогаш инспирација. Ние го вртиме светот :D. Се шeгувам. Но, мислам дека најмногу има удел тоа што сум јас жена – изјавува Вања.
Ѕидните илустрации слично и како тапетите доживуваат големо враќање во уредувањето на домовите и професионалните простории, тие станаа дел од модерното уредување на ентериери, па ја прашавме Вања во каков амбиент таа ги замислува своите мурали.
-Во секакви простории. Од спални соби, ходници, големи канцелариски до дневни и детски соби. Искрено, има еден мал дел од луѓето во Македонија кои се спремни да пробаат нешто поинакво, како во случајов. Но, полека полека и со вакви идеи како Dagg, може да се опуштат и да дозволат да стават цела облога на ѕид со илустрација, отколку да ставаат обичен тапет. Прво затоа што го освежува просторот и затоа што навистина мислам дека големите дела се секогаш најфасцинантни за гледање – ни рече Вања.
Дизајните на Вања може да се нарачаат на преку dagg.mk, на нивниот контакт меил или на профилите на Инстаграм и Фејсбук.
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари