После повеќе од 25 години како главен и одговорен уредник на британското издание на Vogue, Александра Шулман вчера соопшти дека се повлекува од функцијата и во списанието останува до лето. „Иако со месеци се прилагодувам на идејата да го напуштам Vogue, тоа не го направи моментот на соопштување помалку тажен. Привилегирана бев да се грижам за овој прекрасен магазин долго време и уште повеќе што работев со толку многу луѓе сиве овие години што ми го направија искуството интересно и богато“, вели Шулман во соопштението.
Кариерата во новинарството ја почнала во магазинот Over-21, потоа се приклучила на тимот на Tatler каде што стигнала до уредник на содржина. Во 1982 година дошла во Sunday Telegraph, каде што имала неколку функции, потоа била во Vogue како уредник на содржина, па во 1990-та станала уредник во машкиот магазин GQ. Улогата на главна и одговорна уреднична на Vogue ја добила во 1992 година и оттогаш го води списанието низ различни промени и низ трансформацијата во глобален дигитален бренд. Vogue UK лани прослави 100 години од лансирањето, а Шулман е уредничката со најдолг стаж.
Уредничката во соопштението наведува дека е подготвена за нови предизвици и затоа си оди од Vogue. „Тешко е да се најде рационална причина за моето заминување, ама сакав да искусам поинаков живот“, вели таа. Некои сметаат дека тука се има вплеткано уредничката на американски Vogue, Ана Винтур која по една расправија ургирала Шулман да биде отстранета и Александра под притисок одлучила сама да се повлече. Се смета дека ривалството меѓу двете уреднички почнало со самото начначување на Шулман на чело на Vogue UK, кога нејзината претходничка на таа позиција Винтур, сметала дека Александра нема доволно добро модно педигре за задачата. Гласините на незадоволство помеѓу Ана и Александра повторно се појавија по емитувањето на документарец на BBC од минатата години, во кој беше откриено како Шулман пред нос ѝ ја одзема ексклузивната приказна и насловна страница со Ријана, нешто што Винтур го планирала за американското издание на Vogue. Документарецот открива како Шулман има намера Ријана да ја стави на насловна на мајскиот број, но откако дознава дека Винтур ја планира Ријана за истито месец, одлучила приказната да објави порано и на тој начин да ја претрка Винтур. (K.T.)
Александра Шулман и Ана Винтур – вечни ривалки
Шулман си заминува на лето, што значи почнува битката за оваа престижна работа во списанието. Веќе се калкулира кој ќе биде следниот уредник – некои сметаат дека тоа е Џо Елвин, сегашната уредничка на Glamour UK, потоа искусната стилистка Кети Гранд, а некои типуваат на Емили Шефилд, заменичката на Шулман и сестра на Саманта Камерон, сопругата на поранешниот британски премиер.
Интернационалните изданија на Vogue претрпеа повеќе промени во изминатиов период, се отвори дигитална платформа и наскоро принт верзина на Vogue Arabia со харизматичната модна икона Дина Абдулазис како уредничка. По неодамнешната смрт на уредничката на италијански Vogue Франка Соѕани, списанието доби нов челник, а промени на уредничките места има во бразилското и шпанското издание на Vogue… BoF смета дека новите лица во Vogue значат прилагодување на современото дигитално доба, со што се овозможува оживување на брендот. Сè се менува, само Ана Винтур е вечна и не се откажува од уредничката позиција во Vogue US, иако модниот свет би сакал да ја види како отстапува од списанието кое според многумина го изгуби модниот жар…
Нема коментари