Младите дизајнери Алмир Мили и Ивана Цветковска инспирирани од кампањата „Да ставиме крај на насилството врз жените и девојчињата –сега !“, креираа маички кои ќе бидат презентирани на престојниот Моден викенд-Скопје, а на модната манифестација исто така ќе прикажат мини колекции. Со ова дизајнерите се вклучуваат во кампњата на Канцеларијата на UNDP во Скопје, а маичките со нивен мотив ги промовираат шест инспиративни жени, Индира Кастратовиќ, Наташа Петровиќ, Милена Антовска, Лабина Митевска, Ана Јовковска и Вера Милошевска, кои направија фотосесија со Марко Марковски што ќе биде објавена во списанието „Теа Модерна“. Зборувавме со Алмир кој ќе се претстави со моден перформанс во сабота, 4 април, во катната гаража „Солунски конгрес“. Тој веќе неколку пати се има претставено на FWSK, како дел од групни ревии, а последниот пат со колекцијата „Русалка“.
-Новата колекција, односно мини колекција, е инспирирана од самата тема против насилството на жената. Станува збор за еден мини перформанс кој говори за оваа проблематика на жената. Инспирација црпев од сите сцени на насилство врз едно од најубавите битија на земјата, а тоа е жената и нејзината болка, желби, фантазии, реалност, нејзината убавина, инстинкт, мајчинство… Колекцијата е наречена „Титуба“, што произлегува од името на една од првите жени осудена како вештерка во време кога најголема казна за жената е да биде едуцирана и да има свој Глас. Сите сме свесни за местото на жената дури и во 21-от век, поготово во Македонија. Сè уште жените немаат сила да се изборат за сопствениот живот, да се изборат да бидат мајки, да се изборат за сопствената позиција. Целта на кампањата е да ја подигнеме јавната свест за оваа проблематика – изјави Алмир.
Пред официјалното претставување на неговата колекција дизајнерот ни откри дека станува збор за модели со монохроматска колорна карта.
-Користам базични кроеви со акцент на изборот на текстилната карта, која дава една садистичка форма на мода, која отворено го изложува женското тело. А тоа е со цел да се продре длабоко во нејзината срж, и кршливоста и сензибилитетот која ја носи таа – вели дизајнерот.
Алмир открива дека сè што ќе биде презентирано на неговиот моден перформанс е неносливо, по малку скулптурално и изопачено.
-Не следам трендови затоа што стилот говори за уметност, со доза на концептуални моменти. Но се задржувам кон светската дефиниција за сезонски тренд, во минималистичките кроеви и форми. Инаку, секогаш поставувам нови правила на презентирање во склоп на Модниот викенд, освен изработката и дизајнот на парчињата облека, мое дело ќе биде и музиката, како и краткото интро и сите останати сценски перформанси на моделите. Никогаш не очекувам многу, а не очекувам ни малку, мојата цел е да ја подигнеме јавната свест со оваа протестна нота, и се надевам дека ќе има резултати околу тоа – ни рече Алмир.
Изминатиов период младиот креатор максимално го посвети на кариерата и на сопственото градење како професионалец. Кои се плановите за понатаму?
-Јас сум пред сè уметник со посебна пасија кон модата, но идните планови ги насочувам кон редуцирање на целиот тој уметнички свет и создавање нови комерцијални парчиња што ќе бидат екстензија на тоа што го нарекуваме уметничко, неносливо или висока мода.
Нема коментари