Младиот македонски дизајнер Бобан Илиевски, кој стои зад успешниот бренд Chic Undercowear, најавува нова колекција за есен-зима 2014 и отворање на ателје.
-Во моментов работам на нова линија, која што се надевам дека ќе ја изненади мојата публика, а се подготвувам и за отворањето на моето ново модно ателје. Токму поради тие причини и решив сезонава да направам пауза од учество на Модниот викенд-Скопје. Колекцијата ќе да ја претставам со соодветен lookbook, некаде при крајот на октомври-ни открива Бобан.
По освојувањето на наградата на Stylist.mk за најдобар млад дизајнер на Моден викенд-Скопје за есен-зима 2013, Илиевски, неодамна доби уште едно признание, овој пат од Интернационалните бугарски модни награди EIRENE 2014. Преку социјалните мрежи беше соопштено дека креаторот е награден за неговиот инвентивен спој на графичкиот со модниот дизајн. EIRENE се годишни награди организирани од Комората за мода на Бугарија со фонд на награди за учесници на светско ниво, поделени во неколку сегменти и региони. Илиевски беше еден од номинираните за најдобар дизајнер во регионот Европа, земји вон Европска унија и Русија-категорија во која триумфира неговата колешка од Македонија, Олгица Ѓоргиева. Гласањето се одвиваше преку лајкови на Facebook што според Бобан, „за еден ваков фонд на награди, не е многу меродавно ниту соодветствува со рангирање на нечиј труд и измината работа“.
Илиевски ја освои наградата на Stylist.mk за најдобар млад дизајнер на Моден викенд-Скопје за есен-зима 2013
-Неколку месеци подоцна дознав дека сум добитник на специјалната награда за успешна примена на графичкиот дизајн како применета уметност во модни колекции. Морам да признаам дека ми значат вакви признанија. Далеку од тоа дека се пресудни, но сепак значат и се некаква потврда за сечија работа, особено нашава (модата) која секогаш сум ја гледал подеднакво и како применета уметност и како бизнис. Во никој случај не треба да е императивот за кој една индивидуа би работела, но одредена сатисфакција дефинитивно постои. Во мојов случај најмногу ме радува што е признание добиено во еден одреден сегмент од моето работење, што ете луѓето го препознале и им се допаднало , без никаква потреба од агитирање на Facebook за лајкови и поени. Секоја чест на моите колеги сонародници што беа во трка за регионалната награда. Недостатокот на било какви награди од модната сфера и творештво кај нас, со исклучок на наградите на Stylist.mk, допринесуваат за потребата да му се „радуваме “ на секое признание однадвор. Наградниот фонд покрива учество и ретроспективна изложба на тамошната моднанедела, за што сè уште немам договорено детали-вели Илиевски. (А.Н.)
Фото: Жарко Чулиќ
Нема коментари