Спектакуларен гала настан по повод отворањето на изложбата за Александар Меквин во Лондон

Од stylist @StylistMKD · На март 13, 2015

Модниот месец и четирите клучни модни недели добија совршено заокружување со вчерашниот гала настан организиран спроти отворањето на изложбата Alexander McQueen: Savage Beauty, во лондонскиот музеј Викторија и Алберт. Најпознатите ѕвезди се појавија на настанот, повеќето облечени во креации на дизајнерот на кому е посветена поставката, креаторот Александар Меквин. Блиската пријателка на Меквин, Кејт Мос се појави во негов дизајн – црн транспарентен фустан од тантел. Салма Хајек носеше впечатлив фустан со мотив на паун и беше во друштво на сопругот Франсоа Анри Пино, првиот човек на модната империја „Керинг“ која што денес го менаџира брендот на Меквин. Тука беше и Наоми Кембел, уште една блиска соработничка на дизајнерот, облечена во здолниште од пердуви и корсетиран горен дел со цветен принт.

Кејт Мос облечена во креација од Александар Меквин, во друштво на сопругот Џејми Хинс

Во 2011 година изложбата Savage Beauty посветена на модниот гениј Александар Меквин беше поставена во њујоршкиот музеј Метрополитен, во Институтот за костими, привлекувајќи рекорден број на посетители, а сега изложбата се враќа дома, во Лондон, во дополнето издание, со нови и никогаш претходно видени материјали и место за 3Д холограмот на Кејт Мос оригинално прикажан на ревија на Меквин во 2006 година. Како што веќе ве информиравме, ретроспективната изложба официјално се отвора утрем на 14 март и ќе трае до 2 август 2015 година.

FKA Twigs во креација на Меквин од пролет-лето 2010

Меѓу присутните на настанот беа повеќе модни уреднички, дизајнери, манекенки, фотографот Марио Тестино, потоа личности од модата и забавната инсустрија, ликови кои соработувале и пријателувале со Александар, како Анабел Нилсен, шапкарот Филип Трејси и манекенката Ејми Малинс (родена без нозе и која со дрвени протези настапуваше на негови ревии). Впечатлива беше пејачката FKA Twigs која носеше еден од најпознатите модели на дизајнерот – фустан со пердуви во интензивни бои, дел од колекцијата на Меквин за пролет-лето 2018. Како што доликува, повеќето гостинки носеа креации на дизајнерот.