Модната куќа Диор организира ревија за новата колекција во еден антички стадион во Атина, а креациите за ресорт 2022 беа инспирирани од главната тема – ослободување, како и од античка Грција. Во импресивно опкружување на мермерниот стадионн Панатенаикос, креативната директорка на Диор, Марија Грација Кјури, претстави модна колекција во која се испреплетуваат спортките и елегантните парчиња, создадени за слобода на движењето – слободата како тема ја инспирираше и во периодот на карантин, дури и во такви ограничени услови, слободата може да се најде, а дизајнерката ја откри во спортот и движењето.
Колекцијата содржи спортски комбинации со принтови инспирирани од антички слики, во сино-бели комбинации кои потсетуваат на грчките острови, кожни елеци кои потсетуваат на оклопите на легендарните херои, плисирани фустани во кои моделите изгледаа како да се симнати од фризовите на храмовите, но наместо очекуваните сандали или потпетици носеа патики – создадени за модерните Атени.
Dior Cruise 2022 Collection
Финалниот изглед на ревијата на Диор на моменти потсети на незаборавниот лебед-фустан на креаторот Марјан Пејоски што своевремено Бјорк го носеше на Оскарите, но всушност влече поинаква инспирација. Оваа креација реферира на една друга жена која го симболизира женското модно ослободување – Марлен Дитрих. Легендарната актерка на една тематска забава во Холивуд во 1935 година, носеше фустан-лебед со кој ја евоцираше античката приказна за “Леда и лебедот“.
Марлен Дитрих костимирана како „Леда и лебедот“ на забава во 1935 година, како инспирација за лебед-фустанот од новата колекција на Диор
Една од инспирациите на Кјури доаѓа директно од архивата на модната куќа Диор – имено основачот Кристијан Диор во далечната 1951 година ја претстави својата колекција на висока мода со серија на фотографии направена на Партенон, Атина.
Колекција на висока мода на Кристијан Диор фотографирана на Партенон во 1951 година/ Модел од новата ресорт колекција на Диор фотографирана на стадион во Атина
Нема коментари