Советот на американските модни дизајнери (CFDA) во соработка со познатото списание Vogue и Модниот фонд основан од страна на уредништвото, повторно доделија модни награди како поддршка на младите и талентирани дизајнери. Овие награди се востановени во 2003 година и се доделуваат секоја година после четиримесечен дизајнерски натпревар организиран од Vogue и CFDA. Еден од поранешните победници е и Алексндар Ванг, денес светски успешен дизајнер.
Овогодишните победници беа прогласени на гала настан што се одржа вчеравечер, 5 ноември, во Њујорк, на кој се појавија најважните ликови од американската модна сцена и забавната индустрија.
Добитникот на главната награда Керби Џин-Рејмонд и дел од неговата колекција за пролет 2019
Главната награда ја освои Керби Џин-Рејмонд, основачот на њујоршкиот моден бренд за машка и женска облека Pyer Moss. Тој доби награда од 400.000 долари кои ќе ги искористи за понатамошен развој на брендот што го основал во 2013 година. Креации на овој бренд носат Џејден Смит, Дуа Липа, Џенет Џексон, а дизајнерот оствари сработка и со Reebok. Наградата на Џин-Рејмонд му ја врачи актерката Емили Блант.
Награди им беа доделени и на Емили Адамс Боде, дизајнерка на машкиот бренд Bode, и на Џонатан Коен, дипломец на „Парсонс“ и основач на бренд кој го носи неговото име. Тие двајцата добија по 150.000 долари.
Нема коментари