Шарени ранчиња за деца и за возрасни, рачно цртани чанти, персонализирани модели, несесери, торби за пелени, торбичка-бубреже и паричници декорирани со стрип-јунаци, животни, анимирани ликови и друг вид принт се само дел од уникатните креации што секојдневно се создаваат во работилницата на „ Fabrika 13“. Наташа Јакимовска, која стои зад овој македонски бренд за рачно изработени торби, речиси пет години креира модни додатоци поинакви од стандардната понуда. Откако не успеала на пазарот да најде соодветна уникатна чанта во нејзин стил, оваа професорка по филозофија одлучила самата да си изработи еден модел. Процесот ѝ се видел интересен и инспиративен, па не застаната на една чанта. Продолжила со втора и трета, прво за најблиските, а потоа нејзиното хоби прераснало во главна професионална преокупација и создавање на својот бренд „Fabrika 13“. Пред година и пол за прв пат почна со изработка на детските ранчиња со мачиња, по кои стана препознатлива. Станува збор за модели на прерамки кои може да се најдат во продавницата „Бебе слинг“ во Скопје. Во меѓувреме приказната со детските ранчиња има нов апдејт, а тоа се персонализираните ранчиња со преклоп.
-Мислам дека подарокот добива поголемо значење кога е персонализиран, плус ако на тоа се додаде омилениот јунак од цртаните филмови, задоволството е гарантирано. Бидејќи го носат името на сопственикот, нив ги изработувам по нарачка, затоа што и самиот процес на изработка не дозволува украсување на ранчето откако ќе биде готово-вели креативката на чии модели има аплицирано бувчиња, лисици, мачиња, Бетмен, балерини, Star Wars, цветови, кактуси и друго.
Персонализираните ранчиња со преклоп се новите креации од работилницата на Fabrika13
За изработка на ранчињата и мотивите комбинира текстил со текстилни бои. Некои од мотивите во целост ги црта рачно, а некои ги изработува комбинирано.
-Во изборот на техниката се раководам од самиот мотив кој треба да се изработи и го бирам наједноставниот начин за негово реализирање, а во исто време да изгледа убаво и да одговара со самиот материјал на ранчето. Мотивите честопати се јунаци од цртаните филмови, паралелно со животни како мачиња, лисици и сл. Се случува да добијам и конкретна нарачка, а во други случаи јас им давам предлог – идеја на луѓето и се договараме заеднички околку сите детали. Изработката по нарачка понекогаш може да биде и потешка но, секогаш наоѓам нешто инспиративно во нив. На тој начин учам нешто ново, дознавам повеќе за моите купувачи и се трудам наученото да го применам во натамошните изработки. Кога ги бирам боите, светлите бои и комбинации се оние кои повеќе ми се допаѓаат за деца. Ме асоцираат на детска среќа и безгрижност, а таа е и пораката која треба да ја пренесат-вели Наташа.
Наташа изработува и уникатни торби за пелени
Моделите може да ги носат деца до осум до девет години, зашто големината им е доволна за да собере и учебници внатре, а во исто време ранчињата се и меки т.е. од внатре се обложени со синтетички памук. Сега засега овие ранчиња може да се набават само преку фан страната на Fabrika 13 на Facebook.
Јакимовска летово почна да изработува тобички за на половина, популарно наречени торбичка-бубреже.
-Почнав да ги дизајнирам со цел да внесам свежина во понудата на изработки. Мислам дека бубрежињата се навистина практични и бев позитивно изненадена од интересот кој го предизвикаа. Оние модели кои ги изработив беа со летни мотиви: цвеќиња, дрвја, кактуси, лубенички, кригли со пиво. Планирам да изработам и нови, со нови мотиви и да ги вклучам во постојана понуда. Секако, продолжувам и со изработка на торби и чанти. Имам некои идеи за нови модели, само останува да се организирам добро и да започнам со изработка-вели сопственичката на „Фабрика 13“, чие мото е „носете со радост“. Токму чувство на радост будат овие рачно изработени торби и ранчиња.
Шарени ранчиња изработува и за возрасни
Торбичка-бубреже наиде на позитивна реакција кај клиентите
Тобри за бебиња, несесери, паричнички и чанти со принт се дел од изработките на Јакимовска
Ранчиња за модерни девојки
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари