Дело инспирирано од мозаик од крстилницата во епископска базилика во Стоби на македонската дизајнерка на накит Билјана Клекачкоска, се најде меѓу подароците што македонскиот претседател Стево Пендаровски ги предаде на папата Францсик за време на официјалната посета на нашата делегација во Ватикан.
-Ми беше голема чест и задоволство да изработам подарок за Папата Франциск кој годинава во рамки на чествувањето на сесловенските просветители, светите браќа Кирил и Методиј, беше предаден од нашиот претседател Стево Пендаровски. Ова дело, инспирирано од Псалмот 42, илустриран на мозаичниот под од крстилницата на најстарата базилика во Македонија, од сега натаму живее во Ватикан. Едно мало пламенче е запалено и од сега ќе топли и грее – напиша на својот Фејсбук профил оваа успешна дизајнерка на современ накит во кој користи и филигранска техника.
Уметничката композиција Клекачкоска ја опишува како „Три птици собрани околу капка течна светлина на лист од лапис лазули“.
-Двете пауници и гулабицата ги изработив во филигранска техника, наместа со чисто злато. Птиците облетуваат околу капка од горски кристал, која рачно ја обработив и позлатив со 24-каратно злато. Позадината е мозаичен тенок лист од лапис лазули, кој го изработив во Флорентинската техника на мозаична уметност. Ги претставува небесата.
Комбинацијата на техниките и избраните мотиви ги претставуваат едновремено фрагилноста на животот во заедница, бесценетата взаемност и споделувањето во слободата на духот симболизиран низ гулабицата и посветеноста на вечноста, симболизирана низ паунот.
Користените материјали и новото читање на овие древни христијански симболи, дискретно упатуваат на одговорноста да се градат благородни заедници во доба кога заедништвото е под голем знак на прашање – објаснува дизајнерката.
Епископска базилика во Стоби датира од 4-ти век, а мозаикот од крстилницата како инспирација во делото на Клекачкоска дополнително сведочи за културата и духовноста на Македонија.
Нема коментари