На второто издание на Скопски моден фестивал, од 10 до 13 ноември се одржаа модни ревии на 12 македонски дизајнери и брендови, како и ревија на гостин од Косово. На настанот кој се одржа во Скопје сити мол, тие ги прикажаа своите нови модни колекции, а подолу погледнете дел од нивните креации. Првиот ден се претставија Маја Кикириткова, Етник Шала и школата Скала, вториот беше во знакот на Мелани Дигит, Сара Реџиќ, Ателје Краљевски и Роберт Ивановск, третиот ден со ревиите на Herline, Стефанија Насеска, La Maison Cece T. и на Елена Лука се заокружи ревискиот дел од фестивалот.
МАЈА КИКИРИТКОВА
Под називот „Ти можеш, ти си силна“, дизајнерката Маја Кикириткова, чиј потпис е на брендот „Eleazar“, на публиката ѝ претстави уникатни креации скроени за самоуверени жени. Елегантната црна, златната и сивата боја обликуваа сериозен крој каков што ѝ доликува на една вистинска дама.
„Инспирацијата лежи во жената во својата најдлабока форма, жена која навидум изгледа како санта мраз, но со еден допир станува мека, нежна“, вака дизајнерката го долови приказот на својата колекција.
ЕТНИК ШАЛА
Ревиско деби во земјата имаше косовскиот дизајнер Етник Шала кој се претстави преку авангардна ревија на својата најнова колекција. „Гобленот“ беше вивидно забележлив во деталите на фустаните, а освен тоа последниот модел изнесе целосна слика на еден гоблен извезена во вид на наметка. Тоновите на жолта, кафена и зелена боја, комбинирани со розево оддаваа впечаток дека тоа е следниот нов фустан што ѝ прилега на една девојка која не се плаши да се искаже низ облеката.
„Секогаш се трудам да создавам сентиментални креации врзани со моето детство и местото од каде потекнувам. Секое парче е всушност уметничко дело направено преку механички слики извезени во бројки и бои“, истакнува Шала.
СКАЛА
Крајот на првата вечер беше посветен на идната генерација македонски дизјанери, студентите на Академијата на моден дизајн при Школата за дизајн, уметност и технологија „Скала” [поранешно „Џолев и уметностите"].
Инспирирани од претходните декади, застапеното либерално движење со панкерска нота, петте студентки, Марија Трајковска, Ангела Спасовска, Луна Аврамовска, Милица Димитријевиќ и Ива Ивановска навестија експериментални трендови што не влегуваат во рамките на секојдневната мода. Истовремено, креациите блиски до студентите се блиски до помладите генерации, па во фокусот беа смели комбинации од каро здолниште и блузички од тантела и ракавици.
МЕЛАНИ ДИГИТ
Вториот ден прва на сината писта продефилира колекцијата „Фигура“ на Мелани Дигит. Апциклираните капути, мантили и бунди се новитет во нејзината работа, а деби ревијата пред скопската публика проговори за реобновлив текстил што на циркуларен начин се претвора во авангардна колекција. Во соработка со македонскиот бренд за долна облека Sara Fashion, унисекс фигурите на Дигит покажаа дека добрата креација трае вечно. Дизајнерката преку најновата серија ја потврди суштествената значајност на одржливата мода.
САРА РЕЏИЌ
Понесена од хипи движењето како автентичен печат на нејзиниот бренд, добро познатата дизајнерка Сара Реџиќ повторно произведе специфична колекција со традиционални плетива и мноштво дезени како лајтмотив. Низ сите триесет изгледи од „Јесенија“ се провлекува шаренолик израз на силни апстракции конкретизирани во уметничко парче облека.
„Колекцијата е романтична и одржлива приказна која трае повеќе од деценија и продолжување на сè она што со години го работам. Во секоја креација се препознава и чувствува мојата љубов кон правењето облека“, сподели Реџиќ.
АТЕЛЈЕ КРАЉЕВСКИ
Ателјето Краљевски пред фестивалската публика даде неосекојдневен приказ на нослива ексцентрика. Металик фустани, капути од змиски принтови и тантела здолништа беа дел од безграничната креатива што доживеа спектакуларно модно дефиле.
РОБЕРТ ИВАНОВСКИ
Крајот на втората вечер го означи Роберт Ивановски, а ревијата на асиметрична машка линија пренесена во единаесет модели, постави нови темели на машката мода. Присутните имаа можност да погледнат возбудливи креации со едноставна, а сепак драматична естетика што плени. Кралско сината и црна се доминантните бои на бескомпромисните парчиња што излегуваат надвор од границите на секојдневното. Истовремено, колекцијата „X|“ зрачи со удобност за лесни дижења и удобност во она што се носи.
„Брендот создава современа облека за урбани луѓе, кои имаат тенденција да вклучат уметност и безвременски дизајн во нивното секојдневие. Модерен и минимален гот дизајн се главните карактеристики за нашиот стил“, изјави Ивановски.
HERLINE
Брендот Herline покажува дека женственоста може елегантно да се изрази и во спортски парчиња облека. Ревијата започна со музичкиот настап на поп ѕвездата Викторија Лоба, која заедно со моделите прошета низ синиот тепих на дефилето. Освен најновата линија на тренерки, колекцијата „Revelation“ откри и нови едноделни костими за капење со софистициран дизајн.
СТЕФАНИЈА НАСЕСКА
Поттикната од општествените случувања на глобално ниво, модната дизајнерка Стефанија Насеска преку колекцијата „Liberty“ издиктира футуристички, ексцентрични и авангардни трендови за смелите девојки. Бунтовни креации, како фустан со фантомка во неонско розова боја, што истовремено означуваат борбеност, свест, а и ја обликуваат женската силуета.
„Колекцијата е осврнување кон светлината и комфорот како непрекинат поглед кон убавото. Микс на минатото и сегашноста со поглед кон иднината“, истакна Насеска.
LA MAISON CECE T.
Дизајнерката зад потписот Maison Cece T sе претстави во сосема поинакво светло преку „Metamorphosis“, а во центарот на вниманието беа тоалети и комплети надополнети со крзна и кожени мантили. Вистинскиот гламур го донесоа и црната, розовата и црвената како главни бои на колекцијата.
Модната куќа Елена Лука со раскош го заокружи ревијалниот дел на Скопски моден фестивал. Божиците и нимфите од грчката и римската митологија за момент беа присутни во главниот град, оживувајќи преку колекцијата „Satin Dream“. Нежни земјени и златни тонови во лелеава свила и рачно изработени орнаменти се дел од најновата грациозна линија за пролет-/лето 2023.
„Архитектурата, скулптурите и декорациите од старата грчка и римска уметност, вешто се преточени во модернизирана линија на ексклузивни тоалети кои на современите дами кои бараат смел и атрактивен дизајн, им ја овозможуваат привилегијата да се почувствуваат како вистински божици“, изјавија оттаму.
Автори на фотографиите се Антонио Станков и Марко Вилиќ.
Нема коментари