Инспирирана од урбаната слика, градбите и динамиката во Бангкок , архитектката и дизајнерка на накит Александра Шекутковска ја креирала својата нова линија на накит наречена „Градски наративи”. Во нејзин препознатлив минималистички, а повеќеслоен стил, ги создала ѓерданите, прстените и брошевите, кои ќе бидат претставени на првото издание на саемот за накит и модни додатоци „Накит викенд 2016”, што ќе се одржи од 7 до 9 октомври во „Јавна соба“, Скопје.
-Во последните две години живеејќи во мегатрополисот Бангкок, често пати набљудував двојна слика за градот. Од една страна бруталноста на неговата флукс – инфраструктура и креативното милје на неформалните претприемачи како друга. Истражувајќи го градот низ различни размери, од Blade Runner сцените на кровните кафулиња до лавиринт улиците во маалата низ Кинескиот кварт, постојано работев скици и цртежи околу тоа што претставува градот. Заради динамиката на променливост на Бангкок, развивањето на нови алатки, дијаграми како и слоеви за презентација на одредена состојба станува основен услов за негово методолошко разбирање-вели Шекутковска.
Колекцијата „Градски наративи” всушност претставува збир на дијаграми со кои се интерпретираат овие сценографии: спој на сензибилното и суровото во градот кој доживува рапидна урбанизација.
- Овие накит/предмети се куратори на просторните карактеристики, нееднаквото создавање на простори, преговарањето за простор и место и индивидуална потрага по идеалниот полис. Секое од парчињата претставува мапа на одредена геопоетика. Формите се просторни дијаграми, употребените материјали се дрво, сребрен плексиглас и тајландска свила, обработени со ласерско сечење и рачно завршени детали. Композициите се смели и сензитивни со нагласено визуелно графичко решение. Наративите се испреплетуваат преку композиции во кои се рефлектираат моќните импресии од градот како појава, истовремено истакнувајќи го архитектонскиот и дизајнерскиот вкус на оној кој ги носи-вели таа.
Колекцијата е достапна преку веб-продавниците http://www.theurbclv.com/citynarratives/, https://www.etsy.com/shop/theurbclvplatform, http://theurbclvplatform.tictail.com и студиото во Скопје.
Шекутковска е актуелна и со колективот Тhe URB CLV, кој го стартува пред две години.
-Платформата “The URB CLV” во моментов е дел од Pre-acceleration програмата на Seavus Incubator, каде развиваме апликација за урбанистичко планирање. Ваквата одлука е поврзана со минатото искуство како предавач и експерт за урбан дизајн и развој на интернационалната програма на универзитетот Тамасат во Бангкок, Тајланд. Истражувањето на комплексни урбани состојби и ситуациии потикнува размислување и насочување кон алатки за партиципативен дизајн, со кои се развива улогата на граѓанинот во градскиот простор. Во градовите во развој предизвик е да се мапираат вкрстените геометрии на движење кои го прават секој впечаток на градот натопен во динамика и густина. До крајот на годината се надевам дека ќе имаме пробен прототип кој ќе може да се користи и во Скопје. Сметам дека е повеќе од вистинско време да почнат да се создаваат мрежи помеѓу различните актери во јавниот урбан простор и да се размислува за наративите на кооперативниот град-вели таа.
Нема коментари