Модната куќа „Гучи“ и Алесандро Микеле ја претставија новата #GucciShowtime кампања за колекцијата пролет-лето 2019, склоп на видеа и фотографии преку кои се слави златното доба на Холивуд. Дизајнерот на „Гучи“, Микеле, не ја крие својата фиксација со Холивуд и со културата на славните личности. Во новата кампања тој прави омаж на стариот холувудски гламур и на мјузиклите од 50-тите и 60-тите како на пример „Американец во Париз“, „Пеење на дожд“ и „Џентлмените преферираат блондинки“.
Сцените во кампањата се драматични, филмски, спектакуларни со многу модели и статисти, а доминираат интензивни бои како во техниколор филмовите, екстраваганција како во музиклите, сè со цел да се претстави гламурозноста од колекцијата на „Гучи“. Снимени се неколку видеа, во она главното ја слушаме легендарната There’s No Business Like Show Business на Ирвин Берлин, а во некои гледаме духовити „интервјуа на црвениот килим“. Кампањата е снимена и фотографирана од Глен Лачфорд.
Нема коментари