Кинескиот уметник и дисидент Аи Веивеи создаде гигантска инсталација за познатата париска стоковна куќа Le Bon Marché наречена „Детска игра“ (Er Xi), а нарачаните дела на еден од најзначајните автори на денешницата претставуваат суштетства направени од хартија и бамбус кои висат во атриумот над козметичките штандови на луксузните брендови „Шанел“ и „Диор“, како и креации поставени во излозите и во различни простори од зградата. Инспирација за делата на Веивеи се кинескиот фолклор и детските легенди кои им се раскажуваат на децата во последните 2.000 години, поточно од Шан Хаи Џинг (Класик за планините и морињата), збирка на епски легенди и бајки која датира од кинеската антика и е центрирана околу Жолтиот цар, или небесниот император на Западот. Уметникот за инсталацијата користи традиционални фолк-занаетчиски техники, и прави ламји и химери од бамбус и оризова хартија, материјали кои тој ги користел како дете за да го изработи својот прв змеј-летало.
-Воведувањето на фантастиката во рамките на продажен простор допира во имагинацијата на купувачите, посетителите и минувачите. Сите ние имаме паралелен живот од соништа, фантазии и подвизи. Мора да научиме да коегзистираме со нив, бидејќи тие се составен дел на нашата човечност, треба да ја прифатиме нашата митологија. Децата знаат како да го направат тоа природно. Оваа изложба зборува за детето во нас. Шан Хаи Џинг е Кина од моето детство, но исто така и современата Кина, која е митологија што никој не ја разбира, дури ни јас. Затоа е толку фасцинантна – објаснува Веивеи.
Нема коментари