Разговор со Огнена Васиљевиќ во пресрет на Health, Fitness & Wellness Expo

Спорт и фитнес, здрава исхрана и вештини за личен развој, нови спортски дисциплини и потсетување на маалскките игри се дел во фокусот на четвртото издание на Health, Fitness & Wellness Expo кое ќе се одржи викендов, 22 и 23 септември, на терените на Работнички, во Градски Парк Скопје. Овој интерактивен настан повторно на едно место ќе обедини изложувачи, содржини, презентации, вежбање, дегустации на теми здрав живот, вежбање, добросостојба. Зад HFW Expo стои маркетинг агенцијата Моментум, а ние разговаравме со сопственичката Огнена Васиљевиќ која што го подготвува настанот со својот тим и ни откри нешто повеќе за програмата на настанот, но и за тоа што ја инцирало оганизацијата на #hfwexpo.

Како се роди идејата да организираш токму ваков настан и колку сметаш дека преку него се поттикнуваат добри навики за здрав животен стил?

-Идејата дојде спонтано и некако сама од себе. Сè започна со Health, Fitness & Wellness Expo, а дојде како одговор на прашањата: Во што уживам и што сакам да правам? – Здрав и активен животен стил. Што знам најдобро да правам? – Да организирам настани. И би HFW Expo.Драго ми е што со тимот на Моментум настанот го збогатуваме и добива нов лик, карактер, содржина, и што од година во година нудиме се подобар проект. Да, сметам дека настанот поттикнува здрави навики, бидејќи низ годините имаме примери за голем број посетители кои научиле нова спортска дисциплина, или пак биле поттикнати здраво да се хранат, или направат некаков мал чекор кон здравиот начин на живот. Во најмала рака, секој кој го посетува настанот без разлика со колкаво искуство или пракса во овие области, секогаш може да чуе и научи нешто ново.

Фото: Александра Костадиновска

Неколку дена пред почетокот на HFW Expo 2018 програмата е веќе комплетирана. Кои содржини можете да ги најавите и како е поделена програмата?

-Имаме одлична програма на главната сцена, целата може да се погледне ОВДЕ. Програмата е добро избалансирана за да содржи и фитнес и спорт, нутриционисти и разни теми околу здравата исхрана, интересни и нови вештини и дисциплини, како и доста велнес низ разни масажи и третмани. Целта е секој да пронајде нешто за себе и да дојде за да ужива.

Кои се изложувачите на поради кои вреди да се посети настанот? Кои области доминираат?

-Ах, сите вреди да се посетат! J Секако би ги издвоила Sport Inn, кои се единствен официјален Spinning центар во Македонија, а благодарение на нив ги имаме и Gibbon Slacklines Macedonia, па можеме да се запознаеме со Slackline и да си тераме #slacklife, што е посебно интересна дисциплина. Ги поканувам сите да ни се придружат во сабота во 12:30, за големото slackline шоу кое ќе биде посебно интересно.

Би ги издвоила и Be Healthy, високонадежна компанија од Македонија со иновативни производи кои се реткост и за Европа, Ars Lucida Coaching & Training за оние кои сакаат да работат на личниот развој… Но навистина, ќе има огромен број на изложувачи секој од нив максимално интересен и релевантен во темата која ја обработува, па навистина ми е неблагодарно да издвојувам. Ја поттикнувам публиката да дојде и да прошета низ настанот, бидејќи ќе има навистина многу убави содржини и нешта за секого.

Дали посетителите можат на овој настан да договорат некој план за вежбање, да набават здрави суплементи, да слушнат корисни предавања, да се инспирираат да почнат нови здрави навики…?    

-Апсолутно да, сè од наведеното. На настанот ќе може да се прават лични консултации со фитнес тренери, нутриционисти, ќе има одлични предавања и отворени тренинзи, многу дегустации и бесплатни примероци, ќе може да се приклучат и на натпреварот НАРОДНА и да освојат некоја од над 70 награди… Има многу причини за да се дојде 

Да, најавувате потсетување на оваа маалска игра, за што поточно се работи?

-Да така е, правиме турнир во улични игри, а во своето прво издание организираме турнир во НАРОДНА – онаа добро позната маалска игра која ја игравме во детството. Целта е да понудиме и натпревар и активност каде може да се вклучи СЕКОЈ, без разлика на физичката подготовка, искуство, или слично. Сакаме да се размрдаме и да се забавуваме, и да се вратиме во безгрижните детски денови кога сме играле вакви игри. Воедно, ќе има преку 70 награди, па ги поттикнувам СИТЕ да се пријават овде, може и индивидуално и во тим, за еден забавен и возбудлив викенд 

Што вежба и како се грижи за своето здравје тимот на HFW Expo? Дали самите вие сте добри амбасадори на настанот?

-Па мислам дека во голема мера сме добри амбасадори на настанот. Секако, никој не е совршен, па имаме и ние некои не-толку-идеални навики, но ете, јас лично сум најсреќна кога вежбам фитнес, едноставно уживам во сала за вежбање; се трудам здраво да се хранам, и да бидам информирана за новите трендови и насоки во здравиот животен стил.

Софија вели: Иако жалам што морам да признаам, секојдневните обврски си го прават своето кога е во прашање спортувањето. А јас пак секогаш сум имала проблем со  она класично вежбање во сала. Но, обожувам да пешачам! Секојдневно пешачам по минимум 5 км. А доколку времето ми е наклонето додавам некој километар плус во дневните пресметки . Секако, во мојата дневна рутина неизоставен дел се и природните чаеви (и тоа оние на Good Nature). Комбинацијата од пешачење и природни чаеви се онаа добитна комбинација за мене и моето тело.

На Марко пак не му стартува ден без богата порција мешано сезонско овошје. Тој вели: Понекогаш отстапувам од ова, но се трудам да одвојам барем 3 дена во текот на работна недела на активно вежбање, понекогаш и на кејот на Вардар. А викендите се загарантирани за исцрпувачка партија фудбал со пријателите.

Софија, Огнена и Марко спремни за HFW Expo 2018

*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.