По успешните презентаци минатата година на еден од најреномираните шоурум настани во Америка, Модната меџик маркет недела во Лас Вегас и во „Ателје дизајнерс“ во Њујорк, нашата креаторка Нели Илиева деновиве повторно се врати во САД. Дизајнерката, која има дипломирано на„Академија Италијана“ и зад себе има неколку самостојни колекции, од 23 до 25 февруари ja претстави својата нова линија во престижниот showroom за висока мода Coterie во Њујорк.
- Во Нујорк, еден од најмоќните центри на модната индустрија на глобално ниво, самото име Coterie асоцира на успех и можност да се биде дел од најдобрите во светот на дизајнот. Овој showroom недвосмислено го претставува врвот на модната пирамида за дизајнерите, купувачите, медиумите, трендсетерите, љубителите на модата, естетите и сите оние кои на свој начин се инволвирани во оваа индустрија. Искуството е непроценливо и единствено првенствено заради креативната енергија на дизајнерот кој ја споделува својата мисла и визија за модните тенденции за претстојната сезона, но и заради можноста да си изложен пред 250.000 купувачи на тридневен настан кој продуцира продажба од повеќе од една милијарда долари. Со други зборови, естетската страна на Coterie во сооднос со неговиот комерцијален аспект го прават да биде единствен.
>>Станува збор за еден од најпознатите showroom-ови во светот… Како успеа да стигнеш до таму, кои беа предусловите?
-За разлика од другите showroom-ови, влезот во Coterie е ригорозен и се обезбедува преку апликација со исполнување на низа строги критериуми, како и преку оценка и дозвола која се обезбедува од страна на посебно жири. Жирито врши евалуација на неколку парчиња од аспект на дизајн, сообразност со модната тенденција за наредната сезона, квалитет на изработка и материјал. Понатаму, брендот мора да биде препознатлив и уникатен, како и да има веќе воспоставено своја мрежа на продажба. Не знам дали сум првата од Македонија, но секако посакувам да нé има повеќе.
>> Од колкаво значење е промоцијата во Coterie за креатор што доаѓа од мала земја како Македонија. Што тебе (ќе) ти донесе оваа презентација?
-За Coterie се вели ако успееш да влезеш таму, портите на сите showroom презентации во Америка и во светот по дефиниција ти се секогаш ширум отворени. За дизајнер кој доаѓа од мала европска земја и кој се обидува да направи сериозен пробив со својот бренд на американскиот пазар, можноста за претставување на Coterie е повеќе од драгоцена. Мојата линија успеав да ја презентирам пред најголемите сопственици на луксузни продавници во Америка и во светот, и пред мои колеги дизајнери, што самото по себе го сметам за голем успех.
>>Дали за време на престојот во Њујорк и Coterie сретна некои познати модни имиња, и дали успеа да искомуницираш со потенцијални баери и промотери?
-Комуникацијата со купувачите е активност која континуирано тече преку мојот агент за продажба и showroom-от на Менхетен во кој мојата колекција е постојано изложена. На Coterie повторно ја стекнав довербата на моите актуелни купувачи со тоа што имав нарачки од новата колекција, но и ја проширив мрежата со нови клиенти. Во овој бизнис довербата е најважна, така што со мојот тим постојано работиме на продлабочување на овие релации. Што се однесува до изложувачите, имав можност да видам интересни тенденции на млади дизајнери од сите континенти. За новата есен-зима 2014/2015 предизвикот ќе биде во комбинирање на навидум неспоиви материјали и парчиња, во боите, како и во транспарентноста на моделите. Сметам дека Coterie успешно го долови овој концепт.
>>Ја промовира својата нова колекција есен-зима 2014/15 насловена „Пурпурни улици“. Самиот назив алудира на пурпурни нијанси на креациите….Што те инспирира за моделите и каква приказна раскажуваат тие?
-Во однос на самиот назив на колекцијата, пурпурната е боја на духовноста, а улиците симболизираат поврзување, спојување, заминување, разделување, движење, живот, потрага, раскрсници, пресвртници, среќа и тага во едно, чувство на меланхолија кое е неминовно кај секој оној кој трага по естетиката на живеењето. Сите овие улици се во нас, сите овие кружни текови имаат по некој отвор, по некоја можност да се излезе од кругот и да се влезе во нешто поголемо, недофатливо, предизвикувачко. Минимализмот е правецот на кој сум доследна зашто тоа сум во суштина јас самата, а дизајнерот мора секогаш да биде доследен на својата мисла.
>>Какви парчиња се застапени, од какви материјали се и со кои детали ги надополни?
-Колекцијата е богата со парчиња кои лесно може да се комбинираат за различни прилики. Тродимензионалноста преку пикслите искомбинирана со транспарентноста на зелените и пурпурните тонови, златните ленти пресечни во балон сукња и фустан, црвените линии како крајпатни знаци врз волнените палта и капути, платнените каиши разлабавени и навидум асиметрично поставени, сребренометалната отсечност пресликана врз цврст костум кој облекува кревко, сензуално тело. За booklook-от за оваа колекција ја поканив како модел мојата драга колешка Милена Атанасова зашто никој од неа подобро тоа нема да можеше да го долови. Реакциите беа фантастични.
Фотосесијата со креаторката Милена Атанасова како модел ја сними тандемот Ани и Дими
>>За кој тип на клиенти се наменети креациите и каква ќе биде нивната суднина после Coterie, каде ќе може да се купат?
-Жената која го носи мојот дизајн е жена која знае што сака, жена која се чувствува удобно во својата кожа, пријатно со самата себе си, бестрашна, цврста, сигурна во својот чекор, екстравагантна и доследна на својот свет. Она што со сигурност се знае е дека моите модели се продаваат во Америка, но се надевам дека и македонската жена ќе има можност наскоро да ги види. Има еден проект во план, кој би можеле локално да го реализираме, но за тоа понатаму. После Coterie следуваат нови showroom-ови ширум Америка, најважни се оние во Бостон, Атланта и Флорида, поголема маркетиншка и ПР активност во Америка и поблиско испитување на можностите на западноевропскиот пазар. Брендот НЕЛЛИ е сепак производ на италијанската школа за дизајн збогатен со моето долгогодишно искуство и семејна традиција во овој бизнис, и како таков е препознатлив меѓу американските купувачи.
>> Како ти помина престојот во Њујорк….По што ќе го запамтиш ова патување?
-Со Њујорк енергетски изгледа добро се најдовме, зашто ова ми беше третпат за помалку од една година да престојувам во овој град. Јас го доживувам Њујорк како град на можности, град на милиони светла разлеани по неговите висококатници, мостови, авении, град на различни мириси, бои, звуци благопријатни и исцрпувачки, град на илјадници новодојденци кои имаат една и единствена цел, да се обидат и да успеат.
>>Какви ти се плановите по враќањето во Скопје, што има следно на твојата агенда? Мојата агенда е секогаш исполнета со многу работа. Со мислите веќе сум во пролет/лето 2015 год. Посакувам инспирација, пријатни и креативни луѓе околу мене и многу нови патувања.
Фото: Ани и Дими
Фото: Ани и Дими
Фото: Ани и Дими
Нема коментари