НИКОЛА ПЕТРОВСКИ: Линијата Moments of Pleasure ќе ја изненади модната публика

Фото: Димитар Петровски

Ако последната колекција на дизајнерот Никола Петровски за сезоната есен-зима 2014/15 беше инспирирана од љубовта и оживеана во позагасита колор палета, а таа пред неа во живописен силен колорит со цветни мотиви, новата, која очекуваме да ја видиме на претстојниот Моден викенд -Скопје ќе остане загатка сè додека манекените не зачекорат на пистата. Овој пат дизајнерот од Битола, кој бележи речизи две децении работа на македонската модна сцена, одлучи да не открива никакви детали околу колекцијата, веројатно во намера да ја зголеми љубопитноста кај публиката. Фактот дека претставува колекција една сезона однапред, што не е така вообичаено во наши услови, како и тоа дека неговите колекции се однесуваат на машките конзументи подеднакво како и на женските, дополнително ги разгорува очекувањата.

Креација од новата колекција за пролет-лето 2015  модел: Рене („Подиум“)

-Можам да откријам само дека новите модели ќе бидат претставени со моден перформанс 26 октомври во салонот на „Ауди-Порше Македонија“. Името на колекцијата е Moments of pleasure и се однесува на сезоната пролет-лето 2015. По промоцијата на Mодниот викенд- Скопје на пролет, традиционално, ќе биде претставена и на Битолската модна недела. Bо меѓувреме ќе биде изработена и фотосесија за истата-вели Петровски, кој минатиот месец направи фотосесијата за актулената, есенска колекција, во соработка со младиот битолски фотограф Владимир Видановски, која својата ексклузивна промоција ја имаше токму на Stylist.mk.

Од фотосесијата за колекцијата есен-зима 2014 Фото: Владимир Видановски

Во неговата досегашна работа, стилот кој тој го дефинира како женствен и елегантен и за кој вели дека е постојан одраз во неговите дизајни, постојано се надоградува, па ако на почетокот кај него тоа беше дива, бунтовничка со изразена сексуалност и транспарентни материјали, јаки бои и необични дезени , денес веќе може да се забележи софистицираност и елеганција на филмска дива. Одговорот за тоа во кој правец тоа ќе биде насочено и со каква инспирација поткрепено во новата колекција ќе го добиеме на Модниот викенд, кој ќе се одржи по сесетти пат.
-Модниот викенд-Скопје со своето постоење допринесе во многу за афирмацијата и промоцијата на македонските модни дизајнери. Оние кои веќе работеа, создаваа и се претставуваа самостојно (јас прикажував по една или две колекции на модни ревии веќе од 1996 во Битола) им ги доближи на многу поширока публика, но и привлече и натера да создаваат и многу млади дизајнери кои најдоа место каде да ја промовираат својата работа-вели тој.

Сегменти од пролетната колекција за 2015

Петровски со моден дизајн се занимава 19 години и исто толку се претставува најмалку еднаш годишно со ревија пред битолската публика, а како најзначајни моменти во градење како креатор ги издвојува специјализацијата во Софија и тамошното претставување, потоа работата во фабриката за трикотажа „Пелистер“ од Битола и учествата на МОДЕСТ, создавањето на Битолската модна недела и учество на Модниот викенд – Скoпје. Деновиве се престави и на Месецот на дизајн во Љубљана.
-Учеството на Месецот на дизајн Љубљана 2014 со уште неколкумина други македонски дизајнери, како дел од  „Brands&Signs”-интернационална изложба на производи и моден дизајн/избрани брендови од југоисточна Европа за мене преставува остварување на дел од плановите кои ги најавив минатата сезона за преставување надвор од локални рамки.

Никола Петровски зад сцената Фото: Александар Буневски