Ѕвездено патување со „Месиер45“ на Ирина Тошева и Нина Симовска

Од stylist @StylistMKD · На декември 18, 2014

Во магичниот амбиент на скопскиот Планетариум, креаторката Ирина Тошева и дизајнерката на накит Нина Симовска вчеравечер го претставија заедничкиот мултимедијален моден проект „Месиер 45“. Во несекојдневната и екслузивна презентација имаа можност да уживаат само избрани 160 гости. Проектот содржи капсулна колекција, видео и фотосесија за истите. Манекенки облечени во креациите од линијата седеа меѓу гостите, а видео, што го сними Ана Јакимска беше проектирано во Планетариумот.
На проекцијата ѝ претходеше кусо „патување“ низ ѕвезденото небо над Македонија со физичарот Ѓоре Ценев. Тој зборуваше за Месиер 45 или соѕвездието Плејада ( во нашиот народ познато како Квачка), кое било појдовната точка во реализација на проектот на двете дизајнерки. Имено, Месиер 45 е ѕвездено јато составено од седум ѕвезди-сестри кои според митологијата се ќерките на титанот Атлас-носач на небото. Тошева и Симовска во ова ја наоѓаат инспирацијата, креирајќи седум изгледи кај кои е пресликана обоената светлина на небото.

Фото: Миладин Паповиќ

Неуморната Ирина Тошева, која неодамна презентира самостојна колекција за есен-зима 2014/15 во рамки на Модниот викенд-Скопје, вели дека посакува тие што ќе ги носат креациите од „Месиер 45“ да се чувствуваат токму како ѕвездите што им дале инспирација.
-Колекцијата „Месиер 45“ се состои од седум изгледи ирзаботени изработени од луксузни материјали со доработка со вез од мониста и специјално сечење на материјалите. Подготвивме седум изгледи зашто се врзуваме со инспирацијата за седумте ѕвезди, кои се дел од ѕвезденото јато Месиер 45, односно Квачка. Соработката со Нина беше интересна и многу отворена, не се договоривме конкретно кој што ќе прави и шие, туку се одеше спонтано, јас ќе почнам едно парче, таа ќе се надоврзе со доработка. Спонатна и убава соработка, со многу хармонија-ни изјави Тошева по проекцијата.

Фото: Никола Спасеновски

За дизајнерката на накит Нина Симовска ова е втора соработка со наш креатор на облека за неколку месеци, по изработката на линијата Hybrid Vigor со Драган Христов („Лудус“), која беше претставена во Скопје и во Торино. Овој пат Симовска не се јавува како дизајнер на накит, туку активно се вклучила во дизајнирањето и изработката на уникатните седум парчиња на „Месиер 45“ .
-Со Ирина имаме идеја за соработка одамна, но го чекавме вистинскиот момент да се поклопат нештата и да работиме на заеднички и малку поразличен проект. Овој пат сакавме луѓето (гостите) да ги ставиме во малку поразличен контекст и необичен простор, да не биде класична модна ревија. Наместо да објаснуваме, сакавме публиката да ја види и доживее нашата инспирација, затоа сме во Планетариумот. Тргнавме од универзумот, како идеја, и некако Планетариумот, како простор, се надополни на таа замисла. Досега никој нема одржано сличен настан или проект тука. Драго ми е што дојдоа толку луѓе и се надевам дека им беше интересно и дека уживаа во проекциите. За жал, ваква проекција нема да има понатаму …Инаку, овој пат не дизајнирав накит туку активно се вкучив во изработката и доработката на креациите. Користени се полуксузни материјли, има доста везења и доработки . Застапени се долги и миди фустани, панталони, кобинезони и друго-вели Симовска.

Фото: Миладин Паповиќ

На уметничкото видео, покрај режисерката Јакимска работеа Александар Ристески (кинематографија), Бранко Костески (монтажа), а музиката е на Ненад Стефаноски-Брус (Foolish Green). Видеото се надоврзува на „Месиер 45“ обработувајќи го од аспект на митот за создавање на темнина и женската енергија на вода. Промотивниот едиторијал за линијата го сними фотографот Миладин Паповиќ, а како модели се јавуваат Ивана Гелева, Ана Ежова и Сара Миленковска. Изгледот на моделите е надополнет со креативната шминка на Виктор Мирчевски, а за фризутите се погрижиа од студио „Алур“.
Креациите, од кои дел се уникати што нема да бидат повторени, ќе бидат достапни за продажба во концептуаланта продавница на Симовска , Just Because во Скопје. Поддржувачи на проектот се Nescafe Dolce Gusto, Алба, Модна агенција „Подиум“ и Виктор Мирчевски.