Никогаш не е доцна да се почне манекенска кариера. Дури и на 97-годишна возраст! Жив пример е нашата омилената стилска инспирација Ајрис Апфел која официјално стана манекенкa и потпиша договор со модната агенција IMG Models. Сега сестрите Хадид, Жизел Бундшен, Каја Гербер и другите модели може да ги смета за колешки. Познатата модна агенција IMG отсега ќе се грижи за сите нејзини манекенски ангажмани, рекламни кампањи и појавувања на настани. „Многу сум возбудена, никогаш не сум имала вистински агент“, изјави Ајрис која вели дека секогаш сама се грижела за своите ангажмани.
„Ајрис е икона со неизмерлив талент. Таа зрачи со креативност и инспирација и толку сме возбудени што ќе откриваме нови и уникатни можности со неа, и што нејзините природни способности ќе се споделат со светот. На 97 години Ајрис продолжува да докажува дека возраста е само број и не треба да биде нешто што ве дефинира“, вели Иван Барт, претседател на IMG Models и IMG Fashion Properties.
Апфел во 50-тите години од минатиот век заедно со сопругот ја основала текстилната компанија Old World Weavers, а во текот на својата повеќедецениска кариера работела на проекти на рестраврација и уредување во Белата куќа. Во последниве години важи за модна икона и енергична креативна сила која инспирира, таа неуморно се впушта во дизајнерски соработки и позираше во неколку рекламни кампањи за Kate Spade, MAC Cosmetics, Alexis Bittar, HSN и Le Bon Marché.
И сега како официјална манекенка ја чекаат нови проекти. На прашањето што планира следно, Ајрис одговара: „Не знам. Да ме има и да издржам.“
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари