Дизајнерката Антонија Ристовска подготви капсулна колекција за есен-зима 2016 наречена „На полноќ“ за која инспирација најде од ноќта и гламурот која го носи. За промовирање на колекцијата подготви фотосесија со манекенките Елена Гугоска и Јана Јосковска, а фотографиите ги потпишуваат тандемот Ани и Дими.
-Ноќта во зима има некоја своја магија која буди посебни чувства. Снежната прекривка на дрвата, одсјајот на месечината од улиците, небесните ширини после првиот снег… Тој спектар на студени бои е инспирацијата за оваа колекција наменета за модерната жена која е моја вечна инспирација. Романтизмот кој е карактеристичен за нашето ателје се појавува овојпат преку нежните силуети и кроеви кои се нагласени со тенко каивче со мини машна – како заштитен знак за оваа колекција – вели дизајнерката.
Колекцијата се состои од креации изработени од најпрефинети италјански материјали со богати текстури. Кроевите застапени се здолништа и сакоа во стилот на 50тите, свилени кошули, фустани кои ја нагласуваат женственоста, како и капути со интересен крој. Моделите се надополнети со рачно изработен вез со бисери и светки во сребрена и бела боја. Парчињата можат меѓусебно лесно да се комбинираат, а се наменети за вечерни коктел забави и свечености. Боите кои доминираат во колекцијата се снежно белата, сребрената и нијанси на сина.
Креациите се надополнети со рачно изработен накит – ланчиња и обетки изработени од ланци, кристали и бисери, како и венчиња од свилена органза и светки кои го надополнуваат целосниот изглед.
Фото: Ани и Дими
Модели: Елена Гугоска и Јана Јосковска
Шминка: Студио Даниел Николовски
Фризура: Студио Би Ју
Нема коментари