„Кокев“ има нова свечена колекција и моден салон на нова локација

Од stylist @StylistMKD · На декември 4, 2018

Модната дизајнерка Тања Кокев вчеравечер го отвори новото ателје и од ГТЦ се пресели на новата локација во Ристиќева палата, на плоштад „Македонија, во центарот на Скопје. Во пријатна атмосфера таа ги пречека гостите меѓу кои ги забележавме Фатиме Фетаи, Иванна Хаџиевска, Надица Георгиева, Ели Пешева, кои заинтересирано ја погледнаа новата колекција на свечени креации и на дизајнерката ѝ го честитаа почеток на новото модно поглавие. На Кокев чест ѝ направија нејзините колешки, дизајнерки Лидија Георгиева и Антонија Ристовска, како бројни пријатели и познати личности од модниот, културниот и јавниот живот.

За овој предновогодишен период Тања Кокев јa подготви новата колекција Sparkle on, ma Chérie која содржи свечени креации – фустани од транспарентни материјали и нежна чипка, женствени комбинации со тесни миди здолништа и панталони со висока половина, вечерни тоалети и комбинезони, елегантни палта и модни парчиња со богата текстура, а препознатливот во колекцијата се бисерните топчиња навезени на облеката. Фотосесијата за новата колекција ја потпишува тандемот Ани и Дими и можете да ја погледнете подолу во оваа објава.