Неодолив женствен шарм во новата колекција на Bella

Од stylist @StylistMKD · На април 22, 2016

Македонскиот моден бренд Bella ја претстави новата колекција „Bella, за твојот ден“ за пролет-лето 2016 која ја обележува сезоната со неодолив женствен шарм, преку фотосесија направена од фотографското дуо Ани и Дими . Фотографиите се направени со моделите Ангелина Китановска и Сандра Цветковска, на локација во скопскиот Хотел Руссиа.

Во магичниот свет на жените постојат „обични“ и „посебни“ денови. Важниот работен состанок, интервјуто за новата работа, славењето на постигнатиот успех, роденденот на саканиот, свадбата на најдобрата пријателка, возбудата и радоста со која се будите наутро… силното чувство дека токму тоа е „твојот ден“ и дека може да го освоите светот ги издвојува посебните од обичните денови.

Колекцијата пролет-лето 2016 е посветена токму на овие „посебни“ денови и нивната магија. Префинети по својот дизајн и модерен крој со суптилни детали кои нежно ја истакнуваат сензуалноста, парчињата несебично ја потенцираат женствената елеганција која е заштитен знак на сите изградени девојки и жени.

Изданието ги дели парчињата на дневни и вечерни, креирани соодветно за дневен деловен или лежерен изглед, како и за вечерен изглед и посебни пригоди. Чувствувајте се најдобро во својата кожа и во облеката која остава впечаток, одекнувајќи со вашето „Јас“!