Последната дизајнерска соработка на шведскиот бренд H&M со дизајнерите на „Кензо“, Керол Лим и Умберто Леон, привлекува внимание од самиот почеток и најавата. Последниве месеци следевме како изгледаат првите парчиња, каква е кампањата и кои се заштитни лица, која позната личност прва прошета во креација од колекцијата, колку ќе чинат моделите, а пред официјалниот старт на продажбата на 3 ноември, колекцијата KENZOxH&M вчера беше претставена и на модна ревија во Њујорк.
Умберто Леон и Керол Лим
Модната ревија и самата колекција покажаа дека модата може да биде забавна, а дизајнерите ја пренесоа пораката за слобода, младост, изразување на своето мислење, покажување индивидуалност и отвореност. Заштитен знак на колекцијата се животинската шара, интензивните бои и фустаните со впечатлив принт. На ревијата се појавија танчери, музичари, трубачи, тапанари, рапери кои направија вистинска забава на пистата.
Ревијата на KENZOxH&M привлече голем број на познати личности како Сиена Милер, Лупита Нионго, Клое Севињи, Елизабет Олсен, Гилда Амбросио, а присутни беа и амбасадорите на колекцијата Иман и Розарио Доусон.
Нема коментари