Нова колекција на маички, стикери и DreadNotes
По многубројните дизајнерски проекти со кои остави значаен печат врз животот на младите урбани луѓе, познатиот дизајнер и креативец Dreadpen и оваа сезона ја отвора со нов проект – лимитирана летна колекцијата на маички, стикери и Dread Notes. Секојдневието, идентитетот, едноставноста и уличниот комодитет ова лето се одбележани преку новите графички прикази во добро познатиот стил зачинет со нова форма. Новата колекција ќе биде премиерно презентирана на 10ти мај, четврток, во кафе бар „Излет“.
За промоцијата Dreadpen најавува долгочасовноуживање во неговите нови дизајни, со сите драги луѓе, пријатели, соработници, познаници и останати. Dj Goce и Dj Drama од „Зад Аголот“ ќе се погрижат да останете од почеток до крај и да сакате да трае уште :). Новина во оваа колекција и дополнително освежување е соработката со iSTYLE и Beats by Dr. Dre кои одлично се вклопуваат и ја надополнуваат промотивната фотосесија.
Она што е веднаш видливо е дека Dreadpen останува доследен на својата приказна и лесно ќе го препознаете неговиот идентитет и во новата колекција. Тој нагласува дека за оваа колекција внимателно е избран памук кој ви носи потполно летно уживање. „За оваа колекција најголемо внимание е посветено на текстилот за маичките и комбинацијата на бои”, истакнува тој. „Текстилот, според моето мислење, е најважен во едно парче облека, посебно за летна сезона. Веќе некое време истражувам и тестирам различни парчиња и мислам дека конечно сум задоволен со избраниот памук. Дополнително, изработката на маичките и комбинацијата на боите ја дополнува мојата замисла и ја заокружи приказната што сакам да ја раскажам со оваа колекција. Едноставно, сакам да уживаат сите кои секојдневно ќе ги носат моите дизајни исто како што и јас си уживам во нив.”
На промоцијата ќе бидат претставени 5 нови дизајни на маички со колоритна палета која носи изненадувачка свежина и внимателно избрани кроеви, како и куп стикери во нов стил и нови Dread Notes. Фотосесијата за оваа колекција Dreadpen повторно ја довери на својот проверен тим: Елена Фиданска зад објективот и Марина Никушева пред објективот, со освежување од младата и енергична Анастазија Николовска, а промотивното видео го изработи Јана Атанасова. Повеќе информации може да најдете на Фејсбук настанот за промоцијата.
Нема коментари