Откако стана една од најпознатите манекенки во 70-тите години, Лорен Хатон се појави на 40 насловни страници на изданијата на Vogue, сега на еден месец пред нејзиниот 74-ти роденден, познатата моделка и актерка ја краси првата страница на октомврискиот број на Vogue Italia. Со ова Лорен е најстарата жена што некогаш се појавила на насловната на Vogue, а заедно со фотографот Стивен Клајн подготвија три верзии за првата страница и едиторијал. Целиот број е на тема „Безвременост“, а е посветен на жените кои имаат над 60 години.
„Сум се појавила на повеќе насловни на Vogue, но оваа е најважната што сум ја направила, таа што ме направи да се чувствувам најкорисно. Размислував за ова идеја некое време, а храброста на Vogue Italia ја направи возможна. Ова е насловна што може да го промени општеството, бидејќи покажува жена која е енергична, привлечна, која сè уште се смее и која за прв пат е жена на моја возраст“, изјави Хатон за насловната.
Модата во последно време се отвори повеќе за поширока демографија, прво беа поттикнати моделите над 40-тата година, сега има простор и за повозрасните жени. Пред неколку дена Хелен Мирен (72) и Џејн Фонда (79) самоуверенo прошетаа на ревијата на L’Oreal во Париз, Мирен беше и на насловната на Allure минатиот месец, а сè почесто среќаваме повозрасни модели во рекламните кампањи како оние на на Zara и Mango.
Лорен Хатон во новиот број на Vogue Italiа не е претставена во старски имиџ, напротив, таа дури на една фотографија носи секси градник, покажувајќи дека жените на нејзина возраст можат да бидат сензуални и заводливи. Во истиот број се појавуваат и Бенедета Барцини, манекенката од првата на насловна на ова списание, супермоделот Иман и Меј Маск, која на 69-годишна возраст тукушто стана заштитно лице на козметичкиот бренд Cover Girl.
Нема коментари