Откако не успеала на нашиот пазар да најде ѓердани – околувратници што ќе одговараат на нејзиниот винтиџ-стил, блогерката и модел Лумтурије Камили, позната под името Лумија Камилија, одлучила сама да почне да ги изработува. Така, спонтано создала мини линија на ѓердани за околу врат, познати како „чокери“ ( од анг. choker н.з.). Создала малку поинакви околувратници, кои го разубавуваат женското грло на поинтересен и повпечатливен начин.
-Зошто најубавиот дел на женското тело да не се разубавува уште повеќе? Грлото е сензуален дел на женското тело, а „чокерите“ се одличен украс за истакнување на тој феминитет. Добрите познавачи на модата знаат дека околувратниците не се нов аксесоар, и дека оваа година го имаат својот камбек во модниот свет, меѓутоа со еден малку поинаков и повпечатлив изглед, прилагоден за новите генерации. Ѓерданите за околу врат имаат долга историја. Тие се носеле во периодот на француската револуција, кога жените околу грлот носеле црвени ленти, кои што симболизирале тага за тие го загубиле животот. Исто така кралицата од Велс, Александра, носела широка лента со бисери околу грлото за да ја покрие раната. Тие биле исто така омилено парче аксесоар за балерините во 70 -тите, а биле застапни и во египетската, африканската и индиската култура. Оваа историја на „чокерите“ продолжува и денес-вели Лумтурије.
Околувратниците ги изработува на повеќе начини, со различни материјали, кои што се удобни за грлото. Некои се везени само со конец и со рачно плетени ленти, а додека други се целосно навезени со мониста.
-Станува збор за нови парчиња, но инспирирани од стари етнио- везови кои што ги реизработувам. „Чокерите“ се уникатни. Секој што ќе се одлучи да поседува некој од моите околувратмици ќе добие уникатен моден додаток. Досега имам објавено неколку модели, а имам уште неколку во изработка, кои планирам да ги промовирам наскоро. Планирам да продолжам да се занимавам со дизајн и изработка на вакви ѓердани, па за понатаму имам и поголеми планови. Засега има многу заинтересирани за веќе дизајнираните, па тоа ми дава волја за работа. Има и барања за специјални модели. Прекрасно е чувството да ги гледаш луѓето околу себе како ги носат твоите креации-вели таа.
Овие ѓердани се продолжение на нејзниот пост I wear what they wore на кој има објавено етно парчиња комбинирани со винтиџ и ретро облека… Лумтурије вели дека крајно време било за овие нејзини комбинации да креира и аксесоари.
- Мојата страст за дизајнот не сакам да се ограничува само на дизајн за накит. Во светот на модата мора да бидеш отворен. Таква сум по природа- личност што е отворена и не се ограничува, бидејќи лимитираноста ја исклучува можноста за промени, а модата се менува секоја секунда. Мојата модна приказна почна од мали нозе. Облеката отсекогаш ја комбинирав на малку поинаков начин од останатите, знаев старите парчиња на облека да ги преправам, да ги везам со мониста и повторно да имам нов модел. Студирам германски јазик, но модата ми е во крвта и мојата најголема опсесија-вели Лумтурије која моментално покрај изработката на „чокери“ работи и во модното ателје на креаторката Марија Мисајлевска.
Нема коментари