Модната дизајнерка Маја Кикириткова во март годнава после подолга пауза претстави сопствена колекција и на домашната сцена се врати под името Елеазар. „Елеазар е името под кое се вратив на модната сцена и продолжувам да творам под истото. Всушност Елеазар е брендот под кој сум потписник јас, Маја Кикириткова“, објаснува дизајнерката. Таа деновиве ја презентира новата колекција за есен 2019 преку фотосесијата што можете да ја погледнете на Stylist.mk, а низ разговор ни го објасни концептот на новите креации.
Дизајнерката Маја Кикириткова во своето ателје
После паузата што ја направи и враќањето на сцената со Елеазар, пред неполна година претстави сопствена колекција, отвори ново ателје и учествуваше со ревија на Моден викенд. Како помина оваа колекиција и дали си задоволна од реакциите?
-Враќањето на модната срцена со потпис под Елеазар направи голем пресврт во мојата работа. Кога велам голем пресврт мислам на многу нови, задоволни клиенти, позитивни реакции и исполнетост до максимум.
Сега го следиш ритамот на континуирано претставување на колекција секоја сезона и подотви нови креации. Што содржи новата колекција?
-Новата колекција е поделена во два дела, првиот за есен кој се презентира сега, и вториот за зима која ќе биде презентиран во ноември. Есенската колекција е инспирирана од природата и е поделена во пет сегменти. Во првиот сегмент е застапен животинскиот дезен, во комбинација со екокожа, вториот е песочен и овде преовладуваат земјените тонови, третиот е златно-зелен, четвртиот безвременски и преовладува црната боја и петтиот и последен е во сиво-сина боја. Приказната за целата колекција е спојување на овие пет сегменти, каде што животните во есен чекорат по песок и златно-жолти лисја, црно како неизбежен дел и евергрин засекогаш и сиво-плаво асоцијација на небото. Кога се гледа целата колекција во целина гледаме еден пејсаж на есенска убавина надополнета со животни. Целата колекција е надополнета со златни детали, како копчиња, патенти и токи. Повторно е задржан моментот на „оуверсајз“ парчиња облека.
Колку се осврнуваш на актуелните трендови додека креираш и дали ги следиши желбите на своите клиенти и на модната публика?
-Ги следам актуелните трендови, но не значи дека ги вметнувам во моите колекции. Повеќе се фокусирам на идеите и инспирациите во текот на творењето и на побарувачката на моите клиенти. Тоа што добро се продавало во претходната колекција сега е застапено повеќе.
Новата колекција ја претставуваш преку фотосесија, кажи ни нешто повеќе за тоа…
-Овојпат се одлучив на онлајн презентација, за која изработивме фотосесија. Ја сликавме на платото на Македонската опера и балет, како модел се јавува Миа Симоновска од модното студио „Моделс Ин“, шминката и фризурата се на Зоран Шурбевски, а фотографијата е на Just Smile студио.
Нема коментари