Во скопскиот уметнички центар „Џолев и уметностите“ наскоро почнува обука за моден дизајн на кои ментор и предавач ќе биде креаторката Маја Кикириткова, а ќе предаваат и дизајнерите Никола Булески-Буле, Јана Манева Чупоска и Ирина Тошева. Со Кикириткова која веќе има искуство на предавач, зборувавме за тоа што поточно значи нејзината задача на ментор во програмата на модниот курс за која пријавувањето е во тек .
- Модата е начин на живот која се изучува, истражува и надградува постојано, па токму и поради ова ја прифатив понудата од „Џолев и уметностите“, да се jавам во вид на ментор на обуката по моден дизајн која ќе започне од 25 октомври. Веќе имам петгодишно искуство, предавајќи модни предмети на Технолошкиот факултет во Штип, но ова ќе биде одличен предизвик затоа што во текот на 12-те седмици, колку што е и времетраењето на самата обука, учесниците ќе го поминат целиот процесот на создавање на една модна колекција, за која подоцна ќе биде изработен и моден едиторијал. И тоа не е сè, тие ќе имаат можност финалниот производ да го претстават на 14-от FWSK, но и да заработат преку модниот портал за продажба Bastet Noir.
Кој може да се пријави и низ каква обука ќе поминат учениците?
-Секој што има желба за изучување на модниот дизајн може да се пријави на курсот, не е потребно претходно знаење, само ентузијазмот и желбата се доволни. Во школските клупи се изучува изработка на модна колекција, но некако овде и стагнира целата работа што не случај во оваа обука.
Што е она што сметаш дека е најклучно да го пренесеш на посетителите на обуката?
-Ние на нашите кандидати им нудиме поинаква можност, да се пробијат во светот на модата, да можат после завршувањето на обуката да работат и на сопствена колекција.
Дали за време на твоите модни студии некој се издвои како своевиден ментор и колку тоа ти значеше во почетокот и во развивањето на дизајнерската кариера?
-Јас завршив моден дизајн на академија во Белград и ми беше од огромна помош што токму таму во посета дојде Роксанда Илинчич и ни ги пренесе нејзините идеи и почетоци од нејзината кариера. На оваа обука учесниците ќе се запознаат со голем број гости предавачи од светот на модата: проф. Никола Булески – Буле, проф. Јана Манева Чупоска, Ирина Тошева, но и да соработуваат со голем број модни работници и фото модели.
Покрај оваа новина актуелна е твојата работа како дизајнер во ателјето на Тања Кокев, колку таа вo периодов те исполнува?
-Работам во модното Ателје Кокев, каде сум креативно исполнета, успешно ја завршивме Ready to wear линијата, а во моментот се работи на новата пролет-лето 2016 колекција.
Нема коментари