Македонската премиера на филмот „Господ постои, името ѝ е Петрунија“ на Теона Стругар Митевска по неверојатниот успех на Берлинскиот филмски фестивал и освоените две награди (престижната наградата на Екуменското жири и наградата на германскиот еснаф на независни киноприкажувачи), ќе ја има македонската премиера на 14 март во кино Cineplexx и на 15 март во кино Милениум.
Веднаш по премиерите започнува и редовното кино прикажување во двете кино сали во Скопје и домашната публика ќе ја има привилегијата да биде прва која ќе го погледне овој филм.
Од 30 април, започнува и редовната кино дистрибуција на филмот во Франција, каде тамошниот дистрибутер „Пирамид“ ќе го дистрибуира филмот низ цела Франција. Исто така, на 1 мај започнува и редовната кино дистрибуција на филмот во Швајцарија, раководена од една од најголемите дистрибутерски куќи „Тригон Филм“, а на истиот датум „Полифилм“ ја започнува и кино дистрибуцијата во Австрија.
Во месец април, „Господ постои, името ѝ е Петрунија“ продолжува и со својот фестивалски живот. Во месец Април, ќе биде прикажан на 4 фестивали. Започнувајќи со Франција, на 1 април, филмот ќе биде прикажан во Јужна Франција на филмскиот фестивал „Д’Алес“, потоа продолжува на Crossing Europe филмскиот фестивал во Линц. На првото издание на овој фестивал Теона ја освои главната награда со својот првенец „Како Убив Светец“ и сега се враќа како почесен гостин и „Господ постои, името ѝ е Петрунија“ ќе биде прикажан како филм на затворање на фестивалот и од таму тргнува во редовна дистрибуција во Австрија.
Следната станица ќе биде Германија, каде филмот ќе го отвори филмскиот фестивал во Оди Источно, Визбаден во Германија, а Теона Стругар Митевска ќе биде претседател на главното жири. Во исто време, филмот ќе биде и во главна конкуренција со уште седум филма од целиот свет на Интернационалниот филмски фестивал во Келн, Германија.
После успехот и прекрасната реакција на публиката и високите рангирања кај германската и интернационалната филмска критика на Берлинскиот филмски фестивал, не стивнуваат позитивните впечатоци и интересот и секојдневно од целиот свет пристигнуваат поканите за „Господ постои, името ѝ е Петрунија”. Наскоро ќе ги сумираме сите откупени територии и ќе ја известиме јавноста за неверојатниот пласман низ сите континенти.
За филмот „Господ постои, името ѝ е Петрунија”
Во Штип, мало гратче во Македонија, секој јануари локалниот свештеник фрла дрвен крст во реката, а стотици мажи со нуркање сакаат да дојдат први до него. Среќата и просперитетот се загарантирани на човекот кој ќе го фати прв.
Петрунија неочекувано се фрла во водата од каприц и успева да го фати крстот пред другите.
Нејзините конкуренти се бесни – како се осмелува жена да учествува во нивниот ритуал? Настанува општ хаос, но Петрунија опстојува на своето. Таа го освои својот крст и нема да се откаже.
Нема коментари