Септемврискиот број на британското издание на Vogue на тема „Сили на промени“ ги нагласува жените кои прават промени – активистки од различни полиња, премиерка на една држава, манекенки кои се активираат во бројни каузи, актерки и писателки кои се борат против предрасуди и имаат инспиративен импакт на модерниот живот. Овие жени кои ги кршат бариерите и поставуваат агенда низ целиот свет се насловната на Vogue. И тие се избор на Меган Маркл, односно војвотката од Сасекс, која е гостин-уредник на познатото модно списание. Таа избра 15 жени херои на кои им се восхитува, но на насловната остави едно празно место со огледална површина и претставува „огледало за да го вклучи читателот и да го поттикне да ги користи своите сопствени платформи за да изврши промени“. Војвотката верува дека секоја жена е сила за промена и може да смени одредена неправда.
Војвотката соработуваше со Едвард Енинфул, главниот и одговорен уредник на британски Vogue, ставајќи акцент на жените кои го реобликуваат општеството на радикален и позитивен начин – новозеландската премиерка Џасинда Ардем, која што беше фотографирана преку видеолинк, младата акивистка против глобалното затоплување Грета Тунберг, супермоделот Кристи Тарлинтон, адвокат за здравјето на трудниците, и писателката и активистка Чимананда Нгози Адичи, позната по изреката „Сите треба да бидеме феминисти“.
Во изборот на Маркл се и манекенката Адвоа Абоа, активистка за ментално здравје, потоа Џема Чан, Џејн Фонда, Лаверн Кокс, Салма Хајек, Шинед Бурк, Јара Шахиди, Џамила Џамил, Франческа Хејвурд и Адит Акеч.
„Како што ќе видите низ изборот низ целиот број, Меган е подготвена да влезе во покомплексни области, без разлика дали тие се однесуваат на женската еманципација, менталното здравје, расизмот или привилегијата. Од самиот почеток зборувавме за насловната страница – дали таа ќе биде на неа или не. На крајот, таа почувствува дека на некој начин ќе биде фалбаџиски ако таа е насловната за овој конкретен проект. Таа сакаше, наместо тоа, да се фокусира на жените на кои им се восхитува“, пишува уредникот Енинфул во уводникот.
*Не е дозволено пренесување на содржината на www.stylist.mk без одобрени на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари