За студентите од Институтот за дизајн и инженеринг на облека при Технолошко-металуршки факултет, 2017 година ќе значи „Метаморфоза“. Под менторство на професорката Лидија Георгиева, тие ги презентираат своите дизајни во три фази, од кои првата е изложба во рамките на петнаесеттиот Моден викенд Скопје. Водени од оваа тема ќе развиваат идеи налик на трансформација на пеперутка, или можеби некој друг организам. Во своето катче во фоајето со салонот на „Порше Македонија“, каде што се одржува овосезонскиот Моден викенд, тие изложија чаури, пепрутка од копчиња, скици, парчиња накит, меѓу кои и неколку парчиња накит од јадлива превлака. Изложените парчиња панатаму ќе се развиваат во колекции на студентите.
Повторно во соработка со идните биотехнолози од ТМФ, покрај модата, интерпретацијата на оваа тема ќе биде заедно со актуелните трендови во гастрономијата. Изведбата на молекуларна храна и пијалаци е на катедрата за прехранбена и биотехнологија. На штандот на ТМФ ќе најдете и природна козметика.
Втората фаза ќе биде одбележана со традиционалната модна ревија на ТМФ во јуни и на крај повторно учество на Модниот викенд во октомври со ревија, каде ќе биде заокружен целиот процес кој претрпел еволутивни промени низ сите фази.
Нема коментари