Македонскиот бренд „Лудус“ има нова мини колекција
Од денеска, во книжарницата на Музејот на современа уметност – Скопје достапно е специјалното издание на производи на „Лудус”, македонски моден бренд за безродова еколошки одржлива мода. Колекцијата се состои од монохроматски маици со издолжени пропорции, во црна и бела боја, изработени од памук со нула отпад, според заложбите на брендот за одржливо модно производство. Производите може да се носат и како фустани што ја отсликува безродовата визија на дизајнерот Драган Христов.
„Лудус” е македонска модна етикета основана во 2010-тата година, една од ретките што прави пробив на интернационалниот пазар. Добитник на BIG SEE Fashion Award во Љубљана, 2018, NJAL+ наградата на фестивалот „Assembly” во Грац, Австрија во 2019 и WOW SHOW наградата на Љубљанската модна недела во 2020-та година. Колекциите на „Лудус” се застапени во концептуални продавници во Европа и курирани веб продавници за независни дизајнери во САД, Велика Британија, Холандија, Германија и Словенија.
„Лудус” создава унисекс колекции што ги рефлектираат промените во врска со родовата рамноправност во западните општества. Не занемарувајќи го старото словенско културно наследство, „Лудус” креира современи минималистички силуети што се базираат на основни човекови чувства.
Од 2015-та година „Лудус” користи исклучиво природни материјали во колекциите, стремејќи се кон нула отпад во производството и конструкцијата, а со новите динамики наметнати од пандемијата на КОВИД-19 „Лудус” започна со природно боење на дел од материјалите со ботанички состојки. 
Нема коментари