Футуристички, романтични, авангардни и инвентивни креации на тема „Метаморфоза“ претставија студентите од програмата Дизајн и инеженеринг на облека при Технолошко-металуршкиот факултет во Скопје на вчерашната модна ревија која традиционално по 18-ти пат се одржа на роденденот на образовната институција. Тие под менторство на професорката и дизајнерка Лидија Георгиева ја заокружија втората фаза од нивната модна трилогија што почна на последниот Моден викенд, а ќе финишира на следното издание на Моден викенд. На ревијата учествуваа студентите од втора, трета и четврта година, и секој од нив работеше на зададената тема „Метаморфоза“, пронаоѓајки инспирација во пеперутки, лубеници, дрвени струготини, инсекти, птици, листови на растенија, пауни и други мотиви преку кои ја изразија својата визија за модна метаморфоза.
Модната ревија ја отворија деканот на ТМФ, Јон Магдески, и амбасадорот на Франција во Македонија, Кристијан Тимоние, а се обрати и Изабел Марки-Барбо, директорката на Францускиот институт во Скопје, која ѝ додели патување во Париз на студентката Даниела Ѓуровска, во рамките на програмата „Пракса во француски и франкофонски претпријатија“. Наградени се и Ангела Доневска и Христина Христова кои имаат можност за краток престој и професионален стаж во Франција.
Нема коментари